早幾日同朋友落吧飲兩杯，我悠穎馳不嬲奉公守法，明知飲酒就一定唔會揸車，不過我老友彩記就唔聽話，揸埋車去酒吧，我一見到梗係唔俾佢亂嚟喇，點知酒吧老細居然同我唱反調，話今日調咗杯新口味，明知彩記要揸車都猛咁慫恿佢飲酒！
我好明白老細要做生意，做酒吧叫人唔飲酒即係倒自己米，不過賺錢都要賺得有品㗎嘛。喺日本，因為早排發生多宗同醉駕有關嘅意外，其中一單仲有架載住一家五口嘅私家車俾個醉酒司機撞落海，釀成三名幼童死亡嘅慘劇！呢件事喺日本引起好大迴響，於是有人提議修改法例，除加重醉酒駕駛刑罰外，仲要罰埋有份令到司機飲酒嘅人，例如明知嗰個人要揸車，而食肆仲賣酒畀佢，就要受到一樣咁重嘅刑罰，即係最高5年監禁同罰款100萬日圓（約港幣6萬5）！就算係乘客，假如明知司機飲醉酒而你仲坐佢車嘅話，一樣要踎監。
或者你會覺得呢條法例係「誅九族」、唔文明，之但係不妨諗深一層，叫人飲酒揸車，同教唆人犯法、甚至意圖謀殺又有乜分別？所以我都好贊同呢種立法精神。
悠穎馳
豪邁不羈，愛車如命，聽幾下引擎聲就知咩車！