北歐頂級聯賽最近開番，但效力瑞超馬模嘅芬蘭名將列馬倫皆因遇到家居意外，就要遲吓先可以同球迷見面！
開奶畀囝囝仆落樓梯
家陣36歲、喺05年7月加盟馬模嘅列馬倫，3個月前喺半夜開奶畀佢歲半大嘅囝囝飲，點知差錯腳仆咗落樓梯，整親條頸同個背脊。曾效力阿積士、巴塞隆拿同利物浦等大會嘅列馬倫話：「我𠵱家仲未可以好暢順擰個頭同個身去右邊。」查實列馬倫佢呢幾年黑到爆，事關喺舊年6月，馬模體育經理波格喺開水樽時太大力，個蓋飛咗出嚟仲打中列馬倫隻眼，搞到佢唞咗成個月。
列馬倫因為受傷關係，兩季加埋先踢得10場同埋入得兩球，希望佢今季可以踢多啲，幫馬模攞到好成績。
講番前晚啲瑞超，馬模雖則冇列馬倫助陣，但仍然小勝加爾斯。至於希爾星堡就贏加費萊3:1，入第3球嘅就係軒歷拿臣；佢呢球對球迷真係好重要，事關希爾星堡「讓球主客和」開[-1]，就係靠佢呢個波先「主勝」；記得軒歷拿臣早排以借將身份效力曼聯時，幫球迷贏唔少，𠵱家由英超聯返瑞超聯繼續做福星，球迷記住昅實佢呀！