明珠台最近熱播的《俏Betty》，女主角Betty有齊晒醜女的條件，成為潮人中的異類。雖然心地善良可愛的她大受觀眾歡迎，但作為女性，點都渴望同時擁有埋外在美，可惜每次「扮靚」都嚇親街坊，唔想咁樣可以點樣？一於幫Betty度身訂做幾味菜，等佢唔使整容都可以變番靚女吖。
記者：趙珮倩
攝影：譚盈傑
示範：翠亨邨（23762882）
主廚關志強
欖菜肉碎蒸翠玉瓜
需時：20分鐘
價錢：$20/4人
材料：翠玉瓜1條、碎豬肉2両、蒜茸/洋葱粒/紅椒粒/橄欖菜/葱粒各1湯匙、糖/鹽/雞粉各1/4茶匙、蠔油1/2湯匙、生粉/蒸魚豉油各少許
做法：翠玉瓜切片汆水；碎豬肉以生粉撈勻走油，瀝油後與蒜茸/洋葱粒/橄欖菜拌勻，下糖/鹽/雞粉/蠔油/生粉調味，逐層鋪上瓜面，撒上紅椒粒/葱粒，蒸5分鐘，最後淋上蒸魚豉油即成。
知多啲：翠玉瓜清熱利尿，能去水腫腹脹，不宜過份烹調，以免流失營養。
香茅油泡蝦球
需時：25分鐘
價錢：$90/4人
材料：大頭蝦1斤、香茅1條、雞醬少許、鹽/生粉各1/2茶匙、翠玉瓜1/2條
做法：大頭蝦去殼，於蝦背垂直輕𠝹三刀，以鹽/生粉略醃；香茅切碎打成汁，混入雞醬拌勻備用；燒熱油，以中火輕炒熟蝦，撈起瀝油；翠玉瓜切片汆水伴碟，放上蝦球，最後淋上香茅汁後即成。
知多啲：甲殼類海產如蝦，含豐富的碘質，可提供毛髮生長所需營養，能潤澤秀髮。
絲瓜燴魚羮
需時：30分鐘（未計煲湯時間）
價錢：$35/4人
材料：絲瓜1/2斤、鯇魚腩1斤、果皮1塊、薑絲/腐皮絲各適量、鹽/胡椒粉/生粉/麻油各少許
做法：果皮浸軟切絲，絲瓜刨硬邊去瓜瓤，切片備用；燒熱油，煎香鯇魚腩，灒入8飯碗滾水，以中火煲1小時，撈起魚骨，下薑絲/果皮/鹽/胡椒粉/生粉/麻油煮至稠身，最後放絲瓜/腐皮絲，滾起即可。
知多啲：絲瓜含維他命B1和維他命C，能防止皮膚老化、增白消斑，潤肌美容。
蝦子魚唇扒菠菜
需時：30分鐘
價錢：$40/4人
材料：蝦子1茶匙、菠菜1斤、魚唇（已發）8両、冬菇5錢、蒜茸1茶匙、薑2片、麻油2滴、雞湯1杯、蠔油1湯匙、生粉/鹽各適量
做法：將魚唇加入薑片煲腍；冬菇浸腍蒸熟備用；菠菜切段，以鹽水灼熟上碟；爆香蒜茸，下蝦子/魚唇/冬菇，加入雞湯/蠔油/生粉煮至汁稠，下麻油即成。
知多啲：深綠色蔬菜如菠菜含有豐富的葉黃素，可幫助眼睛過濾強光，減低眼睛所受的壓力，令視力更準更清晰。
清炒四素
需時：15分鐘
價錢：$90/4人
材料：粟米芯3両切粒、白果2両、木耳5錢（已浸）、荷蘭豆/紅椒粒各1両、百合2個、威化紙1張、薑汁/鹽/生粉各少許、雞湯1/4杯
做法：將所有蔬菜加入薑汁/鹽汆水備用；威化紙放中油火炸成巢狀上碟；燒熱鑊，下所有蔬菜/雞湯/生粉快炒至亁身，放在威化巢上即成。
知多啲：木耳中的膠質可將人體消化系統內的廢物雜質吸附一起排出體外，有洗滌腸胃的作用；此外，亁木耳若泡後仍緊縮一起的則不宜食用。