食肉獸定食肉瘦？女仔減肥有好多方法，忍口戒食肉做運動係指定動作，唔知澳洲袋鼠係咪成日扎扎跳，跳到成身無晒脂肪同膽固醇，健康到冇人有，所以有人食之來以形補形，食住袋鼠肉減肥，可以瘦出S身形㖭！
記者︰王俊榮
攝影︰伍慶泉
Model︰Mandy@thegroup
講得澳洲自必然諗起袋鼠，香港難得食到的袋鼠肉更能代表澳洲菜健康的特點。好多人怕肥所以避食肉類，食袋鼠肉就一啲都唔使驚呢個問題喇，其脂肪含量接近零，是紅肉類中最低的一種，低膽固醇及卡路里，對心臟尤其有益，靚女們唔使再戒口，大大嚿肉食落肚都唔怕肥啦！
袋鼠柳（8oz）$245
最佳位置：用澳洲自家飼養的2歲以上袋鼠，其背部西冷位置肉質較易入口。
最佳煮法：不用任何醃料醃肉，只將鹽及胡椒撒面，以猛火燒至5成熟，最能保持肉味，配上黑椒汁，入口少少辣最惹味。
肉質口感：因肉地結實脂肪較少，所以肉質偏瘦較粗，但不會有嚡口感覺，相反口感煙韌，再伴上薯仔、番薯片和蘆笋等健康蔬菜，食厭西冷牛扒的話可試吓健康的西冷袋鼠柳。
鱷魚柳（8oz）$285
係人都知鱷魚肉有益，有助改善呼吸道疾病，而香港搵到的鱷魚肉多來自泰國，而且差不多全部都係鱷魚亁，要食到澳洲入口鱷魚扒真係唔易。用橄欖油、檸檬、香草醃製的鱷魚柳燒至5成熟，顏色偏白，肉質較幼嫩，帶有一陣甘香，值得一提的是用牛油、檸檬、醋做成的醬汁，令到鱷魚柳口感更滑溜。
廚師拼盤$118
左面是用椒鹽、果皮、香草炸成的鮮魷魚，配秘製澳洲芥辣醬，入口煙韌；中間是由蟹及龍蝦肉加薯仔打成的肉餅，入口鬆化，點偏酸醬汁夠醒胃；右面用上炸帶子配他他汁，用啤酒粉炸過的帶子更脆口，食落香脆一陣酒香。
黃麖柳（2件）$235
黃麖同屬低脂肉類，廚師用上肋骨位置，貪其有骨有肉有口感。將黃麖柳燒至半熟鎖住肉汁放於雜菜上，配以白蘭地、蘑菇及忌廉製成的燒汁最啱。黃麖柳入口味道較淡，肉汁充足，口感較硬身有𡁻口，而且燒汁香滑同時中和肉本身的微羶味。
精選２人甜品套餐$148
最上的是焗蛋白，即傳統的Pavlova澳式甜餅，香甜硬身，配濃味的野莓雪糕最好不過；中間是朱古力慕絲，味道香濃不會太甜；下左的是用檸檬粉炸成的甜脆肉桂鳳梨，外層脆口鳳梨多汁；下右是甘草雪糕，味道獨特，有點點似咖啡香味，甘瀝味長留口中。
海鮮牛油果批$98
火箭菜下先是以蝦肉、蟹肉及龍蝦肉打成的免治海鮮，再加檸檬汁及意大利黑醋，令蝦蟹味互夾得宜，帶有微酸；而下層的番茄牛油果香滑非常，不與海鮮鮮味互搶，整個冷盤有獨特層次感。
BlackStumpAustralianGrill&Bar
地址︰尖沙嘴諾士佛臺1號（27210202）
營業時間︰
午餐︰星期一至五12nn-3pm；星期六、日及公眾假期休息。
晚餐︰星期一至四5pm-12mn；星期五、六5pm-1am；星期日及公眾假期5pm-11pm。
