位於觀塘的糖山大兄，最鍾意同甜品玩遊戲。第一招玩變身，自創粥粉麵飯甜品版，由紫米粥做粥、蒟蒻分飾兩角扮芒果河粉同士多啤梨撈麵，搵埋綠色啫喱伴碟扮葱花，而飯就用牛奶煮嘅意大利飯。食客可叫套餐一次過試齊，加送咖啡或茶。負責人何先生話：「個套餐一個女仔都食得晒，甜度適中唔怕太漏。」變開有條癮，何先生透露現正研製甜品湯烏冬，用果汁做湯底，打造又凍又甜烏冬新口味，最快今夏應市。
玩完變身玩尋寶，店內另一自創甜品踏雪尋莓開宗明義，有得食又有得「尋」。踏雪尋莓外形白雪雪，其實係雪糕溝忌廉煉奶沙冰，何先生話入面仲收埋兩粒秘密武器，在此賣個關子，留畀食客自己將冰山劈開搵佢哋出嚟。
粥粉麵飯套餐$36
（左前）芒果河粉
（左後）意大利飯
（右前）紫米粥
（右後）士多啤梨撈麵
糖山大兄仿效唱片店，每周更新人氣甜品排行榜頭10名。店內新出品芝士公仔麵屬鹹點冇份排位，但一樣有捧場客。負責人話芝士公仔麵只係卡夫芝士撈出前一丁，不過用上店內秘製湯底調味，包保食客喺屋企撈唔到咁好味。
糖山大兄
地址：觀塘宜安街17號地下E舖（23413801）
營業時間：7:00am-1:00am
座位：36個