近月有幾位商界名人先後逝世，例如利榮森、查濟民、龔如心、高登爵士，其中當然以龔如心之死最為轟動，人未落葬，已隱約聽到爭產之聲，如果他日有官司打，必然又益晒律師同報紙。律師有大筆訴訟費可收，報紙就日日不愁頭版冇故事。
高登爵士（SirSidneySamuelGordon1917-2007）就最少人識，其實他在黃金時代，係羅兵咸資深合夥人、行政立法兩局非官守議員、中華電力董事、馬會董事、中大榮譽博士，係非常有牙力與影響力嘅英國人。佢退休之後，香港政壇就再冇一個咁高地位嘅英國人議員。佢近二十年來十分低調，只為嘉道理父子公司工作，久唔久出現於馬場。佢仲有一隻馬「高勝俠」擺喺黃汝安馬房，可惜久無成績。黃汝安馬房好少有外國人馬主，但高登爵士非常念舊，長期支持呢個最細嘅馬房（二十六隻馬），感情之深厚，馬圈罕見。
到茶樓飲茶，講起名人訃聞，大家當然講及王龔如心之訃聞居然由王德輝具名，大惑不解，怪事年年有，呢單特別考我哋腦筋，究竟王德輝死咗未？法庭已裁定王德輝死亡，先至產生一單家翁告媳婦之世紀爭產案，如果王德輝突然「出現」，豈非玩死所有人及有關連人士？估唔到小甜甜生前咁多怪招（例如收埋啲樓十年唔賣），死後亦搞到新聞界好唔得閒。
龔如心生前記掛丈夫，好多人都知，據講佢在家中一人獨處之時，會拎出王德輝嘅恤衫嚟熨完又熨，情深款款。華懋集團發出嘅悼文話「二○○四年初如心主席在健康檢查時愕然發現患病，立即到哈佛所屬醫院積極治療，可惜經世界名醫診治，用了多種最前沿的藥物，終究不治。」
左丁山孤陋寡聞，唔識「前沿」呢個詞，係唔係由英文繙譯過來嘅呢？「最前沿」應該係「最新」咁解啦，跟住同日（四月十三日）《信報》有程介明教授講「從事最前沿的教育研究」，又有沈旭輝講「前緣青年」，左丁山可以講係學咗嘢，以後可以試吓以「前進的態度和前衞的方法研究最前沿的前緣青年教育問題」！