「寧生敗家仔，莫生蠢鈍兒」，唔理你係木屋區張三，或係山頂大班屋嘅李四，呢句說話都係啱嘅！好簡單，窮人生個醒目仔就唔使俾人「蝦」；有錢人生個叻仔就唔驚盤生意俾人吞咗。
「大富豪」縱橫江湖幾十年，呢排經常要諗計同班過江龍拗手瓜，諗到頭都痕，畢竟年事已高，所以都要俾支棒「第二代」接班，個仔接咗支旗，非常進取積極開拓新水源，向美國佬攞完錢後，就想去問歐洲佬攞錢，諗住拎間公司去大英帝國嗰邊上市炒番轉，於是一班𡃁獻計，一行人浩浩蕩蕩去搵「專業搞手」。
「專業搞手」本身雖然唔係咩知名第二代，但亦屬家底唔差嘅少爺，不過佢真係讀飽書再憑自己真功夫食大茶飯，所以對住「第二代」呢類同輩，講嘢都可以大聲啲。
之但係，佢都估唔到「第二代」流得咁緊要，除咗唔熟自己嗰瓣生意，連用人都用錯，帶班𡃁跟尾，話就話法律、計數乜「人才」都有，但件件都係講到第三句就吹唔到落去。
「專業搞手」覺得，搞上市真係需要俾足時間心機，但唔想浪費時間响「第二代」同佢嗰班擦鞋仔度，成日要聽佢哋「廢噏」，所以咪turndown咗呢單大刁，就係咁，大家見「第二代」隻股游唔到去歐洲水域囉！
[email protected]