不論男或女，無分大人與小孩，誰不愛得獎？除非是金話梅一類爛片獎，所以我們沒有為此鑄造獎座。
人生如戲，人生也如很多場競賽的組合，跑不跑得出，實力之外也要點點運氣。說到底，你無法要別人頒獎給你，你只可以令自己更有實力。今晚，「第二十六屆香港電影金像獎」的各大獎將於尖沙嘴文化中心揭曉。
得不得獎，候選人無法控制，大家各懷甚麼樣的心情去參與這場派對，大抵也不盡相同。毛舜筠恨攞獎，任達華坦然，吳澋滔還不懂投入大人的競賽，只害怕上台會口窒窒。
原來有人可以這樣坦白！
毛舜筠憑《大丈夫2》獲提名今屆香港電影金像獎最佳女主角，賽果今晚就揭曉，鞏俐和劉若英均是其勁敵。面對再一次提名，毛毛覺得此刻心情起伏很大，還特意上網了解外界的評論，她看到有人說這是她與鞏俐之爭，又指其角色是由喜劇轉到悲劇。
盼與青雲捧獎
悲劇，五個女演員都做到，但要由喜轉去悲就有難度，毛毛固然對自己的演技有信心，她坦言也恨得獎。
去年憑《早熟》奪金像獎女配角，不過提名多次影后，始終與影后獎座無緣，毛毛說：「你問我恨唔恨攞影后，我恨㗎，心情就係咁，有時唔恨唔緊張，當係bonus，但當大家都議論，我就好想要，已經唔係應該畀我喇，係最好畀我啦！之前提名過咁多次，今次特別緊張，我發覺身邊同我咁上下嘅都攞晒，如果對我演技係認同，咁我都唔得嘅話，我會話我真係爭啲運，我對自己嘅演技好有信心，亦自信掌握得好好。我年年參加頒獎禮真係好lonely，唔知點解成部戲通常得我一個提名，唔得嘅話，起碼都有大堆人陪我，得我一個，唔得仲要自己好黯然咁走，真係好慘。」
奪今屆影后是毛毛的願望，原來她更想與劉青雲齊齊捧獎，她說：「我同青雲都喺電視台出嚟，捱過好多歲月，喺《水鄉危情》做過情侶，到𠵱家已經17年，大家都係默默耕耘，如果今年大家一齊攞獎，真係開心事，輪都輪到青雲啦！萬一我哋唔得，希望爾冬陞大發慈悲，幫我哋開一部為攞獎而拍嘅戲，咁我就愛到佢死。」
論盡兩大勁敵
問毛毛怎看今次的對手？她坦白地說：「應該唔得嘅，就唔好講，始終有五個人（候選人）。講我認為得嘅，鞏俐呼聲好高，只不過我會覺得《滿城盡帶黃金甲》幫唔到鞏俐喺金像獎攞影后，萬一真係佢攞，咁佢應該覺得自己好好運，鞏俐唔係演技唔好，佢亦係我非常欣賞嘅演員，只係個角色畀唔到一個咁專業嘅演員有所發揮，其實我做咗咁多年戲，都可以做影評。至於劉若英，《生日快樂》入面古天樂家姐個角色，其實係我配音，劉若英做得好好，表現好穩陣，每場戲都交足功課，但個故事比較平淡，你會好難諗到有一幕戲有深刻印象。」
採訪：魯萍
攝影：林德雄
場地提供：國金軒