四月十二日，《國際先驅論壇報》與《華爾街日報》不約而同，以數千字報道美國政府向北韓施壓力，實行金融封鎖，凍結北韓海外資金，逼使北韓在核問題上讓步。兩報嘅報道要夾埋嚟睇，因為兩報重點不同，WSJ講美國本要封殺兩間澳門嘅銀行，布殊唔批，以免得罪中國，最後決定殺雞儆猴，向匯業銀行開刀！做細嘅，就要委屈受苦嘞！IHT呢，直情係寫奇情小說，話美國追查北韓與美國嘅華人黑幫合作走私假美鈔，藥物（包括偉哥）入美國，派出男女無間道滲入華人黑幫搜集資料，整個行動名為RoyalCharm&SmokingDragon，呢啤男女無間道喺二○○五年八月假結婚，喺新澤西大西洋城一隻遊艇上舉行婚禮，呢隻遊艇名叫RoyalCharm，婚禮請帖寄畀好多疑犯，仲送埋機票㖭。結果唔少到場參加婚禮嘅黑幫分子當場被捕！整個案件一共拉咗五十九人，搜到四百五十萬假美鈔，冒牌香煙與藥丸。後來美國再深入調查，發覺黑幫與北韓以澳門為洗錢基地，於是一路查落去，卒之變成國際政治事件。
咁好睇嘅材料，有黑幫、北韓核彈、澳門洗錢、賭場、無間道、間諜、高危高層次政治談判，夠晒拍一部好緊張刺激電影──無論點都好，經西方傳媒廣泛報道，澳門已經成為世界知名「洗錢城市」。又係噃，澳門司法人員不久前在一位貪污嫌疑犯家中，發現幾億元現鈔，簡直嚇死人。咁多錢，點解擺喺屋企，唔放入銀行？賓架Ｗ話：「咁大數目，日日存啲，都要搞好多日啦，銀行唔懷疑就假。」原來貪污受賄都有一個「吸收能力問題」，賄款多到吞唔落，洗唔切之時，好容易產生破綻，惹人思疑，此乃貪字變貧嘅二十一世紀解釋。
貪官坐監，去邊度最舒服呢？泰國通話：「最好係泰國，以前有位銀行家入獄，軍方派人接佢入軍事監獄服刑，內有貴賓室，呢位銀行家就在內軟禁六年算數，唔知幾舒服。」中國通又講：「中國都唔錯，一位朋友在北方經商，俾人陷害入獄，只係受苦四日啫，之後安排好，佢可以在監獄內自由行走，睇電視，可以點菜叫外賣，三年後出監，成個人肥肥白白。」