港股唔再跟外圍股市走，𠵱家主導港股嘅係祖國市場，作為香港散戶，間接同大陸股民坐埋同一條船，你又知唔知人哋點炒股呢？成日話大陸散戶炒得瘋狂，網友股迷喺《中金貼吧》引述大陸傳媒報道，原來炒股喺大陸已經滲入唔同階層，退休阿伯、打工仔、公司老闆，甚至大學生都因為炒股，令到生活不知不覺起咗奇特變化。
大學生遲交學費炒股
廣州部份大專院校，以班級為單位，炒股學生佔全級高達10%；嗰啲讀經濟管理專業，比例仲高。如果以宿舍為單位計嘅話，好多宿舍已經係「全民皆股」，仲有啲學生為咗留番啲錢嚟炒股，竟然扣起啲學費唔交住。唔少學生股民股票戶口都有十零萬貨，雖然係咁，但係老師唔鼓勵亦唔反對，只係提醒學生注意風險，如果經濟條件有限，就唔好入市。乜聽落咁似證監會忠告股民嘅宣傳口號嘅。
茶樓阿伯講公司前景
朝早喺廣州老城區某家茶樓，成圍檯阿伯傾緊，「日後天津濱海新區打算點開發同規劃呀？」
你唔好以為佢係領導，只不過係一班退休散戶，摸住茶杯底、食住蝦餃燒賣之餘，對某家上市公司嘅發展前景吹緊水。
師奶散戶信炒股必賺
呢一邊，聽股票行負責幫客人開戶嘅工作人員講，新開戶嘅股民，好多連大字都唔識得幾多隻，莫講話股票係乜嘢，就嗱嗱聲排隊開戶，搞到佢日日都要同呢啲師奶散戶講解炒股「ABC」常識。
另一邊，排隊等開戶炒股嘅唐大姐話：「雖然我對股票一啲都唔識，但炒股一定賺到錢，我有個好姊妹，佢老公經常聽到內幕消息，肯定賺嘅。最近聽佢畀嘅消息，跟住買股票嗰啲姊妹，都賺咗十幾萬嘞！」
收市後見客成為行規
喺銀行做嘅張先生話，𠵱家公司大部份人都有炒股，因為近排股市比較敏感，所以盡量避免喺開市嘅時候見客。「好彩個客都係同道中人，所以收市後見面，成為咗呢行嘅新行規。」
就係因為咁，大陸部份行業家吓嘅辦公時間喺下晝3點、股市收市打後。
（註：內地股市交易時間是上午9:00至下午3:00正。）