台灣嘅幾米係亞洲區嘅大師級繪本作家，原來喺上一個世紀，英國都有一位繪本界嘅超級明星，佢就係暢銷童話經典《比得兔》（TheTaleofPeterRabbit）系列嘅作者波特小姐，佢嘅全彩色繪本故事書充滿童話嘅幻想世界，原來喺現實中都埋藏住一個動人愛情故事，如今雲妮絲惠嘉同伊雲麥葵格演繹嘅愛情片《波特小姐：比得兔的故事》（MissPotter），就為觀眾重譜呢個愛得夢幻嘅戀之故事。 撰文：戶川淳
對於波特小姐琵雅翠絲波特（BeatricePotter）嚟講，比得兔係佢最好嘅朋友，所有生活上嘅喜怒哀樂都能同佢哋分享，波特小姐隨手意外畫出嘅插畫，獲出版商嘅注意，喺對方努力說服之下，讓波特小姐同意出版比得兔嘅插畫書。
美景淡化傳記色彩
本周四（19日）上映嘅《波特小姐：比得兔的故事》就係講雲妮絲惠嘉（ReneeZellweger）飾演嘅波特小姐，如何結識到伊雲麥葵格（EwanMcGregor）扮演嘅出版商諾曼華恩，一段浪漫嘅愛情也就此展開，呢段情緣唔止影響佢一生，仲令到《比得兔》傳頌全世界。
一般古裝傳記片調子沉重，《波》片卻以美麗嘅愛情同風景做賣點，勝在可以輕鬆消化。影片專注喺主角嘅甜美初戀上，反而有關佢繪畫發展同創作過程嘅着墨唔太多，啱晒鍾意睇浪漫愛情片嘅觀眾。
演活未婚女子心情
整部片充滿愛情詩意，雖然情人節已過，但影片就好似專為情侶觀眾而設嘅二人套餐一樣，浪漫到暈。另一方面，由波特小姐畫出嚟嘅動物角色，仲會跳出畫紙，又會搗蛋唔着衫，活潑可愛之餘仲充滿童心㖭。
至於女主角雲妮絲惠嘉喺《BJ單身日記》（BridgetJones'sDiary）入面已經演活現代未婚女子求愛嘅忐忑心情，今次佢牛刀小試，挑戰演技扮演維多利亞時代人物，佢舉手投足，甚至臉上嘅焦急、羞喜，都出神入化，可以話係再次成為單身熟女嘅銀幕代言人。