日本怪雞型男小田切讓主演嘅新片《東京鐵塔》前日喺日本開畫，電影公司仲好有信心話《東》片會打破去年木村拓哉主演《武士的一分》嘅40億日圓（約2.6億港元）票房紀錄。呢部戲係改編自作家LilyFranky嘅同名小說，喺日本大賣200萬本。小田切讓前日仲同片中飾演佢媽媽嘅甘草女演員樹木希林等現身戲院，答謝觀眾支持。