澳門祥泰（199）上星期五開始試衝1年下降軌，呢隻瞓覺股，一起身，又係等爆。祥泰家陣喺澳門路環聯生項目，以應佔權益計（32.5%）計，擁有土儲樓面276萬平方呎。集團計劃興建住宅項目，兼且地段位於金光大道南端，賣樓已經有sellingpoint。
不妨計計數，就當項目每方呎樓面係咁意賺500大元，祥泰已經可以獲利兼增值近14億銀，相當於每股0.59元，超過祥泰現價（0.475元）。連埋呢項潛在增值計數，祥泰NAV可以上到1.25元，折讓上到62%，澳門地產股當中，祥泰嘅折讓夠晒吸引。
再講，呢個項目首期150萬平方呎，亦已經計劃喺今年中推售，即係話，祥泰好快踏入收成期。以祥泰現價翻半番到0.71元，NAV折讓仲講緊43%。又呢期市場狂炒瞓覺股，好多隻P/B都炒上1倍樓上，祥泰喺低位橫行咗成年，一衝穿條技術阻力，兼喺熱錢效應底下，分分鐘又係一支火箭。
遠店冷灶燒一燒
遠東酒店（037）又係另一隻橫行成年嘅瞓覺股，但呢期所見，成交開始異動，股價拾級而上，冷灶可以燒一燒。遠店最新NAV係0.81元，現價（0.36元）折讓56%，已經有NAV墊底。又遠店揸住荔枝角地皮，齋計地盤面積，已經接近28萬平方呎，呢塊土儲隱藏價值一旦反映，遠店NAV就唔止家陣一個幾毫。呢轉短打，博升兩成，股價見0.43元，仲未有耐到NAV水位。
錢雋