提起譚小環（小環），相信大家一定諗起香港小姐，相約美貌與智慧並重嘅佢做訪問，原來唔單只樣靚咁簡單，智慧分分鐘仲高過我同你，事關佢唔單只同我哋講車經，仲首次開腔大談儲蓄投資之道，正如佢話齋：「啲錢係好辛苦賺番嚟㗎嘛！」投資搵到嘅錢，講到明唔買化妝品、唔買靚衫，寧願買車好過：「揸車關乎自己條命仔㗎喎，梗係買架最好、最穩陣嘅車啦！」
文：許一楓
攝影：陳盛臣
鏡頭前後兩個人
由知道可跟小環做訪問的一刻開始，身邊朋友不約而同地問：「譚小環係咪經常做蝦蝦霸霸、貪錢、揮霍嗰個小女人？」或者小環過去做嘅角色太深入民心，小記嗰刻都有啲擔心同緊張，鏡頭以外嘅佢同現實究竟有幾接近同幾唔同。
緊張時刻終於來臨，陽光普照嘅一日，小環同助手準時到達中環，見一身白恤衫配橙色短裙嘅小環落車，小記嗰刻個心突然舒暢起來，陽光照着美人兒，小環真人確實好靚，而且仲好瘦；白皙嘅肌膚、烏黑眼睛，配上長長嘅美腿，攝記老星同我互望一下，或者大家都等待面對面傾談同影相嗰刻吧。
小環一開口，螢光幕上嘅潑辣尖酸口吻完全消失，小記不由自主講咗句：「你真人真係好Fit好瘦，仲靚過上鏡！」小環笑笑口咁話：「啲人唔知我咁瘦，佢哋完全唔認得我囉！我係得個頭呃倒人，人哋睇唔到我個身有幾瘦㗎！」
銀色旅途由選美開始
從小培養慳儉知識
以為女士們最愛扮靚、行街街，不過面前嘅小環就話要嚟個與別不同：「睇唔出呢？我係一個好慳儉嘅人，由細到大，屋企人都教我要慳，要識得積穀防饑！」小環絕對唔係空口講白話，「以前未入行做空姐時，經常飛嚟飛去，當時我住喺香港仔，機場仲喺九龍城，我唔搭的士而拖住個篋去迫巴士，雖然辛苦啲車程又耐咗，不過我覺得都係要慳啲使囉，搵錢唔易嘛！」
就算參選港姐入咗行之後，置裝使費少不免，小環依然奉行慳儉守則：「始終我唔係日日要影相、日日有Function，平時又可以着得樸素啲，毋須買咁多衫。至於化妝品方面，我鍾意用完一隻先再買，唔會一下子買幾款唔同嘅牌子，咁都慳唔少㗎！」
慳錢為買車
衣、食同住對小環嚟講，都唔會作太大支出，反而對於「行」，小環卻甘願花費：「我份人係好細膽同驚死，一架穩陣、實在嘅車對我嚟講好重要，對於車嘅要求自然好高，加上我差唔多日日都要揸車，所以車嘅使費我反而好願意畀。」
原來曾經有過揸寶馬同日本車嘅不快經歷，所以小環始終覺得歐洲車，尤其Benz先最得佢芳心，「記得以前揸過嘅日本車，一上高速公路成架車會飄，好冇安全感，嗰刻更加覺得買架穩陣嘅車好緊要！而Benz可以講喺咁多車款之中，最實際同最襟用，加上有我最愛嘅配套同外形，所以一定揀番佢。」
不斷Tradein當保值
呢架CLK200喺05年以46萬買入，或者有人會覺得好貴，不過小環卻樂在其中，「其他嘢樣樣都可以慳，用錢買衫對我嚟講亦都係一件唔實用嘅事，不過買車就絕對唔慳得，呢個係價值觀唔同嘅問題。」
買車除咗用嚟代步之外，小環原來仲有深一層嘅目的，「我之前嗰幾架車，每架揸咗3至4年左右就會將佢哋Tradein，因為架車行咗咁多里數之後，始終都會有損耗，所以按當時市場價值賣番出去就係最佳保值方法。」
小環仲同我哋講：「就算將來要再轉車款，都一定會揀番Benz，始終日本車升跌波幅好大，Benz二手價都有番咁上下，支持力較大！」真係想唔到小環精明如此，仲幽默地回應：「處女座係唔會大花筒㗎！」
明星多愛CLK
若要數明星們最愛的車款，實非Mercedes-BenzCLK莫屬，不論是舊款還是新款，他們也會投下支持一票；就以02年登場的新一代型號為例，當年代理曾引進多個版本抵港，後來在05年6月推出的Facelifted新版，更引入全新CLK280及CLK350取代原有CLK240及CLK320。小環擁有的這部CLK200Kompressor，引擎是配備了機械增壓系統的1.8公升型號，馬力達163匹；外觀用上流線型設計的同時，更採用無B柱設計，縱使置身在後座，也不怕視野受阻。
Mercedes-BenzCLK200Kompressor規格
引擎：1,796c.c.直4DOHC配Kompressor
馬力：163ps/5,500rpm
扭力：240Nm/3,000rpm
傳動：5前速半自動波
當年新車價：$460,000（Avantgarde）
現時二手價：約$330,000起