國際貨幣基金組織（IMF）早排預測，未來30年，全球房地產市場嘅繁榮景象可能逐步消退。耶魯大學經濟學教授羅伯特．希勒曾警告，樓市泡沫一旦爆破，恐怕會引發經濟大蕭條；英國政府首席經濟學家斯特恩（NicholasStern）就認為，氣候變暖可能導致全球經濟大蕭條。
咁多末日警告，網民又點睇呢？有人就喺《MSN討論區》問：1930年代嘅大蕭條究竟會唔會重演？
過度放款多壞賬
financiallyfit話：「美國人鍾意先使未來錢，所以利用樓宇按揭去大舉消費，一旦佢哋無力還債，或者銀行收緊信貸，美國樓市同經濟都會大受打擊。喺上世紀30年代嘅經濟大蕭條，原因之一就係銀行過度放款，當中好多貸款變成壞賬，家陣嘅情況有啲相似。」
bunchargum估計，美國未來5年可能出現大蕭條，導火線係恐怖襲擊、美元大崩圍、樓市陷入危機、債務過重、禽流感，甚至美國同伊朗開戰等。經濟轉差，政局亦會變得好動盪。
PatrioticStablest話：「萬一經濟真係變得咁差，我全家會搬去鄉下間大屋住，過番啲簡樸兼自給自足嘅生活。嗰度有水井同風力發電機，唔使畀水費、電費，我哋仲打算自己種菜、飼養牲畜，咁樣就可以減少生活開支。」
管治改善可過關
不過，Ameiko就比較樂觀，佢講：「幾年前，美國科網股泡沫爆破，近年油價又大幅飆升，但經濟問題都能夠迎刃而解。美國政府現時嘅經濟管治能力，好過二、三十年代好多，就算樓市泡沫爆破，相信美國經濟亦可以應付，應該唔會再出現好似30年代嘅經濟大蕭條。」