港股在1月底的20971見頂後，高位爭持近1個月，在2月底3月初才急跌到18659，是否完成中期調整，暫時仍難確定，但由低位反彈，恒指能重上20500點水平，市底之強，卻遠出市場意料之外。
上星期，恒指裂口高開後，在20300至20500拉鋸，承接力頗強，現時10日線（20071）已升越50日線（19930），而20日線（19723）亦會在幾日內升越50日線，形勢會變為大好，但前兩個高位（20844同20971）的阻力好大，不易升破，越接近高位，回吐壓力越大，一次較大幅度的調整隨時會出現。不過，炒股唔炒市，三四五線股仔嘅升浪已成勢，呢個「勢」應該仲會維持一段長時間，特別係轉型股同消息股，日日都會有「新貴」，升勢亦會好凌厲。
轉型股當炒，「殼股」吃香，又「清」又「純」，兼且瞓緊覺，未郁過嘅殼股更難求，今日推介嘅安全貨倉（237），真係一隻好「完美」嘅殼股，無論係大股東要將佢私有化，抑或係轉型，股價都會大升，諗得過。
過去大半年，推介過兩次，去年8月同12月，股價分別係3.46元同3.50元，上禮拜五收3.75元，嚴格來講，根本係冇郁過。不過，上星期股價同成交可以話係有小小異動，話唔定今次在殼股熱潮下會一飛沖天。
每股淨值應逾10元
安全倉上周五曾升上3.80元，收3.75元，連升3日，成交亦增加，股價終於升破由去年8月開始的3頂阻力，而MACD亦出現雙牛入貨訊號，衝破05年6月中的4.05元，即可望空衝刺，初步上升目標係4.80至5元。
06年度（3月結算），安全倉每股資產淨值8.42元；07年度中期，每股資產淨值9.13元，升值0.71元，計及物業及投資組合增值應超逾10元。安全倉係大冷門股，可小注持有，收住息，等佢發力，博賺5成至一個開。