車廠重視女性市場，推出為女士而設嘅汽車當然係好事，不過有時過份重視亦係另一種歧視，就好似日產喺「2007紐約國際汽車展」上，所展出嘅呢款InfinitiEXConcept汽車，廠方話係考慮到女性用家需求而推出，所以喺架車嘅前面、兩側及後面加咗4個鏡頭仔，方便睇到四周圍嘅障礙物及方便泊車，另外亦加咗套防止行車線偏離嘅裝置，當架車偏離行車線嘅時候就會發出警號。
呢兩個咁實用嘅功能，其實無論係男人還是女人都用得着，點解廠方咁標榜係「考慮女性用戶需求」而推出嘅呢？係廠方對女性寵愛有加，還是想兜個圈嚟話女人唔識揸車、要靠呢啲裝置先至可以安全駕駛呢？真令人費解！
不過大家咪睇小記講到咁咬牙切齒就以為小記係女人，查係我都係男人，只係唔抵得日本車廠咁樣玩曲線歧視啫。
記者：周達之