東方有色（230）上周四晚公布06年度業績，受惠於投資物業重估收益大升及撥回發展中物業撥備合計逾8800萬元，去年純利大升276%至1.06億元，每股盈利13.71仙。業績強勁刺激股價上周五裂口高開，其後越升越有，最後勁升30%收市。由於公布業績同時，該公司發表另一份通告建議改名，中文名變五礦建設，英文名則由ONFEMHoldings改做MinmetalLandLimited，須知道集團舊名都沿用咗好多年，忽然改名，難免令市場忽發聯想。
呢隻同近期亦都公布佳績嘅五礦資源（1208）份屬同系，母公司為中國五礦集團，係央企級企業，國內A股仲有隻叫五礦發展（600058），而東方有色與同系公司業務稍有不同，以建材同埋物業發展及投資為主。
該公司除咗透過旗下金橋瑞和經營玻璃幕牆設計及安裝等建材生意外，旗下兩個樓盤正在及即將預售，分別係珠海嘅「東方傲景峰」，以及南京嘅「東方龍湖灣」，兩個項目都用緊原有公司名，無理由忽然又將樓盤頭兩個字改做五礦啩，因此，好難唔令人相信，母公司有意重組呢間子公司。
其實東方有色早於年初已有動作，1月初宣布將所持有720萬股招商局中國基金（133）出售，每股賣22元，套現1.58億元，獲稅前收益1.4億元，相等於每股賺0.18元，獲利甚豐，是次套現令手頭現金增至3億元，有助開拓剛開展的地產發展項目。紅籌注資近排炒得火熱，呢隻蚊型紅籌，市值只得6.9億，隨時炒得仲癲。
粵海製革亁炒牛河
上周五粵海製革（1058）急升43%，成交1023萬元，位列升幅榜第2位，粵革耐唔耐就炒私有化，但次次都係得個講字，而最重要係此股貨疏成交細，就算單日成交忽然大增，過幾日都可以無晒買賣牌，高位接咗貨分分鐘沽唔出。