陳浩民、馬浚偉和楊思琦等昨日為電視劇《天機算》宣傳，一向身邊女伴多多的陳浩民，更遭其他演員在台上笑他戲裏戲外多戀事。對於花弗戀聞，陳浩民果然有膽做，夠膽認，他不以為然說：「多女朋友，唔覺得係有損形象，咁我人緣好啫！」
無綫劇集《天機算》開拍期間，陳浩民被指滿身酒氣開工，又經常遲大到，拖延拍劇進度，令馬浚偉極度不滿，更直指陳浩民不夠專業。
昨日陳浩民、馬浚偉兩位主角一同在奧海城為新劇宣傳，兩人在台上有傾有講，但就欠缺默契，你有你講，我有我講。陳浩民因為多戀事，女伴猶如走馬燈轉不停，成為同劇演員的取笑對象，羅敏莊昨日說：「陳浩民喺劇入面同現實一樣咁多女朋友，咁多女伴，不停周旋在好多女角之中。」
賣樓賺大錢
無綫昨日更邀請了麥玲玲在台上講述劇中的人物性格，講到陳浩民，麥玲玲竟然大爆陳浩民剛剛賣樓賺了一筆錢，記者追問陳浩民是不是成功變賣了跟佘詩曼的舊居賺錢，他說：「我都冇同阿佘買樓，我賣咗層樓，所以想買番層，咪問吓師傅幾時入市好囉！」
問到感情事方面，陳浩民可有向麥師傅請教，他說：「冇喎！要來自然會來，隨遇而安喇！」
陳浩民之前被拍得跟台灣、內地女伴外遊，態度親暱，不過，他否認跟該些女伴拍拖，他說：「我好得閒，𠵱家單身，嗰啲報道唔使信，我又冇條件，我又唔係咁好，所以我唔揀擇，都係隨緣，你鍾意人，人未必鍾意你，𠵱家冇時間同異性交往，被人影到嗰啲都係朋友嘅朋友。」
唔怕損形象
早前又有報道指陳浩民召妓，他同意有損形象，表示曾被公司問話，他說：「嗰日我係同Bobby（歐陽震華）一家大細去Disco，唔係做啲唔道德嘅嘢，咁樣寫我都驚有損形象。」不過，陳浩民就堅決不會避忌，他說：「預咗！我對得住天地良心，合情合理合法，至於多女朋友我唔覺得係有損形象，咁我人緣好啫！」
採訪：楊潔雯
攝影：陳俊強
