人生像場夢又似齣戲，足球比賽亦然。果種捉不緊而又要努力奮戰嘅態度，旁觀者可能會覺得熱血沸騰，又或者認為幾戇居，不過那管成敗得失，努力過起碼無悔此生。今日我要推介嘅係兩支想爭冠軍，但結果可能得個桔嘅拜仁慕尼黑同阿爾克馬爾（AZ）。
兩隊剛在周中歐洲賽出局，努力咗大半季，最後好似發咗一場夢；惟有回到現實，在球季餘下的1個月，起碼還有另一個夢──本土聯賽冠軍。
雖然小弟都覺得佢哋今屆攞聯賽冠軍嘅機會唔大，但單從今場波睇，佢哋絕對有重注捧場價值。先講AZ，爭霸機會細個燕豪芬同阿積士，但佢哋個窄場，恰得死國內班嘍囉；對手維廸斯唔上唔落，AZ班生牯仔唔驚踢完不來梅後回唔到氣，捧佢哋個「老正」波膽贏2:0、3:0啦；重注則可選讓球主客和「主勝」。
拜仁保3甲必去馬
至於拜仁上仗對AC米蘭，已證明隊波已非歐洲一線球隊，不過今次主場續戰，戰意會好到加零一；事關今季不入前3，連來屆歐聯席位都無埋，班高層仲唔震個貓王；1.4倍W，顯見大莊覺得食硬排名低一級嘅利華古遜。
貼完波，講吓睇戲，小弟放假都好喜歡去戲院幫襯，最近睇咗齣《魔疫》，覺得拍得非常唔錯；至於喺娛樂版影評多半個蘋果嘅《太陽倒數》，喺兩齣都有睇嘅友人眼中，認為後者根本冇得揮，網上影評亦多讚《魔疫》。可見現在普羅觀眾眼光幾雪亮，報紙佬畀貼士，你又信幾多呀！
重心出擊
讓球主客和
阿爾克馬爾勝[-1]
文：蘋果波神
狂迷英國波，尊崇雲格；成與敗，視乎你是否找到真快樂！