星期六朝早揸車返工嗰陣，電台不斷報道新田公路發生咗一單嚴重交通意外，其中一部涉及意外嘅專線小巴車頭損毀嚴重，並導致車上17人全部受傷；初時我仲以為係小巴司機超速行車，繼而失控撞向前車，殊不知後來經警方調查後，初步懷疑有車違例Cut雙白線，小巴為閃避而撞壆同撞向貨櫃車。
若意外真係一如警方所講，係由一部違法Cut雙白線嘅私家車造成的話，我諗嗰位司機嘅駕駛態度真係好有問題；由學車嗰一刻開始，大家都知道係唔可以Cut雙白線扒頭，而且仲要係違法行為，如果喺明知嘅情況下而去咁做，麻煩佢一係唔好再揸車，一係就返去重新學吓點樣揸車，免得再害人！
至於那位小巴司機，由於車上不少乘客皆指意外發生時無超速行車，所以今次意外嘅責任未必喺佢身上。不過有樣嘢要提提各位司機大佬，就係要時刻慬記自己揸緊嘅係一部公共車輛，車上16條生命全操控喺你手上，並要以近年嘅小巴意外作借鑒，提醒自己小心駕駛，千祈唔好超速；如果你係乘客，若發覺小巴超速的話，就要即刻抄低車牌、時間及地點，然後向交通投訴組（電話：28899999）投訴。
悠穎馳
豪邁不羈，愛車如命，聽幾下引擎聲就知咩車！