新加坡文華酒店的海南雞飯，出名係出名，但好多人都話唔夠抵食，因為一般在新加坡食到的海南雞飯，即使好出名，如天天、文東記，都唔使成百港銀，二、三十蚊有交易。
最近我悠樂祥又去新加坡，喺上年重新開幕的中峇魯市場，搵到又抵食又好好好好味的海南雞飯，而且仲係「正宗」文華酒店水準，好想介紹俾大家！
呢間「中峇魯海南起骨雞飯」店的老闆MaxCheong，以前係新加坡文華酒店二廚，專責海南雞飯的浸雞程序，即是隻隻海南雞都係由佢親手製作。幾年前老闆自立門戶，去年喺中峇魯呢個「街市大廈」的food-court開店。我到訪當日，一小時內人龍不絕，想食都要排近廿個人先得，非常好生意。味道如何？雞肉滑皮爽脆醬油正宗，的確係文華水準！
海南雞飯：3坡幣（約HK$15）
地址：中峇魯市場二樓82舖
營業時間：每日10am--9pm
悠樂祥
酷愛旅遊，搭飛機多過搭巴士，天生樂天派。