任達華04年憑電影《PTU》和去年的《黑社會》兩次榮膺金紫荊影帝，在今晚舉行的金像獎頒獎禮中，他憑電影《黑社會以和為貴》獲提名最佳男配角，他坦言視電影《父子》的童星吳澋滔為最大對手。
最緊要享受
頒獎禮如箭在弦，華仔連日工作忙得透不過氣，他表示除了趕拍電影《文雀》外，日內又要到內地拍廣告，為了尊重金像獎大會，華仔答應今日中午趕回港出席盛會。
從影生涯中經歷過無數成敗得失的華仔，賽前心情十分平靜，日前他還到尖沙嘴做gym，然後抽空接受本報專訪，特意挑選在海邊拍照的他輕鬆地說：「我𠵱家心情好平靜，今日就專登嚟到海邊relax一吓，我係嚟睇海，唔係跳海，我從來對攞唔攞獎都抱平常心，因為頒獎禮年年有，只要我一日未退休，一日都會繼續拍好啲戲，況且每年評審嘅標準都唔同，得獎只當鼓勵，冇獎咪出年再努力過。我嘅心態同流水一樣，長流不息。」
華仔坦言曾見過有些演員獲獎後，未有再發憤努力，他說：「某啲人攞完個獎，反而害咗佢，變得冇晒方向。」所以他只視獲獎是錦上添花，他續說：「就算冇得獎，只要用心演好部戲，一樣會得到觀眾嘅認同。我覺得作為專業演員，好應該要有呢種進取精神，咁樣大家共同努力，香港嘅電影圈先會越做越好。」
他更形容參加金像獎就像出席一個美麗的晚會，他說：「邊個攞獎我都咁戥佢開心，最緊要嗰晚大家都好好享受。」
大讚吳澋滔
知己知彼，百戰百勝，華仔也有留意其他角逐最佳男配角的對手，尤對年僅10歲的吳澋滔印象難忘，他說：「譚家明部戲真係為Ian（吳澋滔）度身訂做，佢好聰明，演繹父子情好投入，不過我喺《黑社會以和為貴》裏面同個仔嘅對手戲，一樣演得唔差，最終要睇評審決定。」
採訪：比華利
攝影：林德雄