轆Book　走向都市化：<br>CR-V收起士啤胎　粗豪變斯文

轆Book　走向都市化：
CR-V收起士啤胎　粗豪變斯文

原來唔單止觀察一種動物嘅進化，可以知道一個地區嘅環境發展，觀察一款車系嘅進化亦同樣可以；小記觀察過本田CR-V後，就知道過去10年都市化現象不斷蔓延，郊外林地逐漸消失，皆因由第一代發展到家陣第三代，外形上嘅郊野味越來越淡，而房車味就越來越濃，證明用得着CR-V嘅郊野地方漸漸減少，而本田亦要將CR-V變到成部房車咁嚟襯番高度發展嘅現代都市。

記者：周達之　
攝影：伍慶泉　
模特兒：Chimpy

士啤胎不見了

離遠望見呢部黑色車身嘅新一代本田CR-V，差啲以為係一部豪華房車，事實上CR-V嘅設計真係一代比一代優雅。對比番第一代，新車嘅外形更加流線，車頂圓潤不在話下，側窗更係向尾部水滴式收窄，充滿咗房車款嘅流暢線條，而最明顯嘅莫過於將車尾掛上後備輪胎嘅設計取消，後備輪胎擺番落尾箱，呢個新設計僻去咗濃烈嘅越野味，變到成個斯文人咁款。呢個改變好明顯係為咗市場需要，所謂適者生存，動物要改變自己嚟適應不斷改變嘅環境，車又何嘗唔係呢。

■士啤胎唔見咗，換上圓潤嘅屁股，成個斯文晒。

咪睇佢斯斯文文

雖則CR-V外表變得斯文，但查實內裏依然奔騰。今次介紹呢個版本係採用咗2.4公升i-VTEC引擎，最大馬力有成170匹，最大扭力22.4kgm/4,200rpm，小記用佢嚟試上大斜路，完全係輕鬆自如，唔會有牽強嘅感覺，相信就算喺載滿人嘅環境下亦可以應付自如。
試行了一段中速路段，踏下油門，引擎隨即順暢高速運轉，加速流暢，一啲都無粗魯嘅感覺，只係感覺上新CR-V嘅懸掛好似比以前調得硬咗一丁點，令司機對路面嘅感覺多咗一丁點。後座嘅震動感似乎多過前座，段估係因為車身前面佔嘅重量比例多啲嘅關係。
新車重心較低，轉彎時車身傾側無上代咁明顯，相信去到郊外開快少少入彎都唔會太Fing。車重約1.5噸，唔算好重，所以無乜鈍嘅感覺，而整體操控反應似乎遠離咗SUV，傾向房車多啲。

■後座亦唔輸蝕，攤喺度都幾歎。

■5前速自動波，操控簡單過簡單。

■座椅雖不是真皮鑲嵌，但勝在仿桶形設計好坐。

■3幅式軚環，下面嘅銀邊幾搶眼。

■上斜一段感覺好力，唔會窒吓窒吓。

最緊要安全

內櫳方面，空間夠大視點夠高，加上CR-V本身唔係牛龜咁大嗰隻，所以揸起上嚟都幾輕鬆。音響等設備一應俱全，車頂設天窗一個夠晒開揚，不過或者值得一提嘅係佢嘅安全設備，CR-V配備咗前座雙安全氣袋，亦有自動預縮安全帶，廠方話安全帶可以喺氣袋爆出前0.008秒、或者有一定程度的撞擊時自動收縮，而ABS、EBD電子制動力分配系統、BAS電子式煞車輔助系統等等，都可以大大增加行車時嘅安全性。

記者點睇

講真一句，外形變得斯文咗感覺上會以為佢嘅Off-road表現會差咗，但試過之後其實除咗套懸掛校硬咗啲之外，本質上係無乜分別，反而副偈仲提升到170匹，好力咗唔少。雖然亦有2.0公升版本，不過馬力呢樣嘢無人嫌多，小記都係鍾意2.4版本多啲。