香港人日忙夜忙，朝朝早唔願起身，返工又周身攰冇厘精神，睡眠不足固然係主因，此外如果體內缺乏鐵質亦有影響，皆因咁樣會減低氧氣輸送到身體各部份嘅功能，因運動能力降低自然易感疲倦。今日搵嚟香港首席三項鐵人李致和（Daniel），教吓大家食啲乜嘢可以「硬淨」番，佢話自己平時多食含豐富鐵質嘅新鮮紅肉、菠菜之類，所以時刻都充滿力量，打好個底先可以為港爭光嘛！
記者：趙珮倩
攝影：陳盛臣
芥末牛柳
需時：20分鐘
價錢：$30/3人
材料：牛柳8両、蘑菇3粒、青豆10粒、鹽1/2茶匙、日本芥辣1/2支、沙律醬2湯匙、生粉適量
醃料：生抽/生粉各1茶匙、糖1/2茶匙
做法：牛柳先醃15分鐘；蘑菇切片汆水備用；將醃過的牛柳蘸上生粉，下滾油炸至硬身，撈起瀝油；燒熱鑊，將日本芥辣/沙律醬/鹽混入2湯匙水拌勻，煮至稠熄火，牛柳/蘑菇回鑊，下青豆兜勻即可。
鳳眼大肝
需時：30分鐘
價錢：$18/4人
材料：豬膶1件、鹹蛋黃5隻、碎豬肉3両、滷水汁500毫升、鹽/糖各1/2茶匙
做法：豬肉先以鹽/糖略醃；豬膶劏開，放入鹹蛋黃/豬肉，用牙籤縫合；滷水煮滾，下豬膶滷20分鐘，撈起攤涼後切片上碟。
貼士：豬膶一定要完全攤涼才可以切，否則鹹蛋黃餡會好易散晒！
知多啲：肝臟雖含豐富鐵質和維他命B2，但膽固醇較多。
菠菜茸海鮮羮
需時：25分鐘
價錢：$20/2人
材料：海鮮2両、蘑菇2粒切片、菠菜葉4両、雞湯11/2杯、蛋白1隻、鹽少許
做法：先將海鮮/蘑菇汆水備用；菠菜汆水後過冷河，放攪拌機，加入雞湯打成茸，倒出煮熱，下鹽調味；海鮮/蘑菇回鑊，放蛋白攪成絲，最後以少許生粉埋薄芡。
紫米上肉排
需時：1小時
價錢：$25/3人
材料：紫米3両、排骨10両、紅穀粉1湯匙、薑4片、葱1束、八角2至3粒、片糖1/2片，鹽/生粉各少許、紹酒1/2杯、生抽1湯匙
做法：先將紫米略浸，以1:11/2水的比例蒸熟；排骨斬件以鹽調味，走油備用；爆香薑/葱，排骨回鑊，下八角/片糖/紹酒/生抽/紅穀粉，加水浸過面，燜45至60分鐘至腍。最後以生粉埋芡，淋紫米排骨面上碟。
鳳凰三色蛋
需時：30分鐘
價錢：$12/4人
材料：皮蛋/鹹蛋黃/雞蛋各6隻、鹽/麻油少許
做法：皮蛋/鹹蛋黃切粒，放入已拂勻的雞蛋，下鹽調味；燒滾水，以中火蒸20至25分鐘，然後放入雪櫃；之後取出切片上碟，最後掃上麻油即成。
貼士：蒸蛋時隔幾分鐘揭起蓋，可免出現「蜂巢洞」。
知多啲：蛋類含維他命B2，有助碳水化合物、脂肪和蛋白質的代謝，給身體提供正常熱量，不易疲倦。
鐵人愛食牛
身為鐵人的Daniel，每日至少接受3至5小時訓練，運動消耗量極大，少啲能量都唔掂，究竟佢平日食乜嘢可以咁Fit呢？「我好鍾意食牛，免治牛、豉椒炒牛，一次可以鋸三塊牛扒。此外，回鍋肉、酸辣湯、肉醬意粉我都鍾意食，唔會為KeepFit而戒口，因為一訓練就消耗晒。不過比賽前3日就要食得好小心，會食多啲含碳水化合物嘅食物，例如一餐食兩、三碗飯，等身體儲存足夠能量。」原來，阿媽教落，要有飯氣到肚，真係有根有據㗎！
中菜總廚梁輝雄
示範：海景嘉福酒店（27215161）
