上市公司換主席係唔係大新聞，好睇嗰間係乜公司，因為作為國際金融中心，有成千間公司喺香港上市，公司賣殼易手都係等閒事，不過，上個禮拜五國新集團（1215）換主席，就吸引華華嘅注意。國新只係三四線公司，大股東係曾經做過福布斯富豪嘅張揚，除咗國新外，張揚亦揸住國中控股（202）。
吸引華華注意嘅唔係張揚唔做主席，因為佢已經唔係大股東，一位名叫胡翼時嘅人，喺3月尾向聯交所申報，佢揸咗接近16%國新，而國新上周五宣布，委任胡翼時做主席，袍金一年只係20萬蚊。
胡翼時一早已同張揚拉上關係，舊年5月，佢向國中控股買咗間附屬公司歷新投資返嚟。間歷新買返嚟時只係有權買西安高新技術產業開發區一幅唔夠400畝嘅地。
不過，胡翼時沾手香港上市公司早在04年6月，仲係楊瀾揸fit嘅陽光文化媒體（𠵱家叫泰德陽光），搵咗胡翼時做執行董事。更有趣嘅係，4月2日國新委任咗李宗揚做執行董事同埋行政總裁，李宗揚02至04年喺陽光文化做執董同埋副行政總裁，即係話，胡翼時同李宗揚以前係同事。
仲有市場流傳胡翼時係某國家領導人嘅仔，但華華查過，呢位領導人個仔叫胡海峰，至於胡翼時同胡領導係咪真係有親，華華仲要查吓至知。
[email protected]