花旗股市持續一次最長嘅升浪，但以升幅計就唔算好勁，呢樣嘢唔難理解，咁多壞消息同不明朗因素，升得咁上下就有回吐，好正常。不過，睇股市唔可以咁科學化，尤其係短炒，始終係供求關係，加埋大戶嘅把戲，所以市場中人好鍾意講sentiment，講feel，如果大家感覺到普羅大眾嘅sentiment，又對個市有feel，應該會feel到花旗個市仲未升完，上個禮拜三跌咗1日，跟住就升番2日，壞消息當聽唔到、睇唔到。你話大戶下一步想點？
早排全世界都話炒家嘅carrytrade拆倉，全球金融市場會有得震冇得瞓，但呢排睇番美金走勢，大家又話carrytrade又返番嚟，咁即係話全球資產市場又有排升？大家睇吓金價同資源價格，都唔敢即刻否定呢個諗法。事實上，carrytrade拆倉可能只係日本年結嘅技術效應，𠵱家睇嚟，都幾似。G7發表公報，叫中國加快人民幣升值，但對圓滙太弱隻字不提，咁即係向carrytrade炒家着綠燈，跟住呢幾個禮拜應該有好戲睇。
花旗股市上禮拜五造好，港股今日唔會失禮，短線會節節推高，係搵番筆嘅時候。
國壽C輪2136：唔使講都知上禮拜邊隻股票最矚目，就係國壽（2628），無論睇走勢同成交，都見到大戶同散戶鬥搶貨，明日公布業績後，相信大行會調高估值，有買就要趁手。早幾日介紹過國壽C輪4867，加注可以諗吓隻槓桿率大啲嘅2136，上禮拜五收36.5仙，槓桿率6.9倍（有效5.3倍），對沖值0.75，正股升上27元，2136應該升至50仙，正股升上30元，隻輪應該喺75仙樓上，正股跌穿23.80元止蝕。