仲想爭西甲冠軍嘅皇家馬德里，上周六作客被桑坦德下半場兩記12碼所累，硬食當頭棒，最終反勝為敗輸1:2，賽後皇馬職球員、甚至連一向偏幫巴塞嘅輿論，都抨擊球證阿維利斯盲目亂吹！
卡比路：「忍無可忍」
臨場皇馬讓平/半嘅賠率變化唔大，似乎球迷對艦隊已死咗條心，但魯爾33分鐘門前建功，令艦隊一度視3分為囊中物；然而，球證阿維利斯下半場突然「發功」，判咗兩個具爭議性12碼畀桑坦德，加雷中鵠令艦隊反輸1:2！阿維利斯更一不做二不休，完場前更將希古拿同美查亞驅逐離場，篤定艦隊返魂乏術。
卡帥賽後面容平淡但語氣辛辣：「我對球證判決從來甚少回應，但今次忍無可忍，球證先判了一個不知所謂嘅手球，而對方把罰球不斷移前，佢竟視若無睹。」當事人之一簡拿華路固然怒轟12碼亂判，並強調判罰根本冇commonsense：「我只有1米76，但施積身高2米02，試問我點樣拉跌佢？」痛失3分對艦隊爭逐聯賽造成嚴重打擊，而希古恩下半場觸傷，更喺卡帥傷口上灑鹽！