佐丹奴（709）舊年純利勁跌49.4%，總舵手集團主席劉國權自己都要減人工，不過，減幅就冇同業績睇齊，係咁意減5.57%。睇番佐丹奴最新年報，劉國權06年連同951.5萬花紅（點解盈利倒退仲有花紅嘅？）嘅總薪酬，只係輕微跌至1316.5萬銀。
專責搞大陸業務嘅執董馬灼安，人工就減得多啲，由343.3萬減到293.4萬，減幅14.5%，主要係06年花紅減咗一半得番50萬。多年嚟負責台灣呢個一直冇乜起色市場嘅執董馮永昌，繼續無花紅收，不過整體年薪就反而多咗5.64%，升到204萬。
講開佐丹奴，經過6個月嘅研究同籌備，終於公布旗下大眾化品牌BluestarExchange嘅重新包裝計劃，會改名做「BSX」，店舖仲以黑同白做主色調，第一個試點就喺黃大仙龍翔中心。劉國權話，若果成功，會陸續改造其他分店。華華預祝佢成功啦！
另外，同樣純利倒退39%嘅長江基建，除咗甄達安舊年至出任執董人工無得比較外，主席李澤鉅同15個董事嘅總薪酬都冇減過，李澤鉅同甘慶林分別維持807萬同814萬，而有得加嘅3個董事關秉誠、葉德銓同藍鴻震，加幅分別係5.84%、12.10%同16.67%。
[email protected]