投資基金可以長期持有，但唔知係唔係一定升值。呢日聽藝術Ｐ講，買基金，買個別股票，收埋唔理等升值，就不如買油畫，揸佢四五年，升值以倍數計，好過做乜。左丁山聽咗為之心郁郁，但即刻畀藝術Ｐ潑番冷水：「不過，買基金股票唔會買到假貨，但買中國油畫就隨時碰到贗品，令你一殼眼淚。嗱，世界性拍賣行拍賣中國油畫，都曾經中過招呀，不過背後傾掂賠償，大家唔張揚啫。」
咁樣，不如買歐美油畫，藝術Ｐ冷笑：「唔好話我大膽講句，香港人識得幾多歐美畫家呀？識咗中國有啲名氣嘅畫家先啦。目前最大市場就係中國，內地一年有一千個拍賣會以上，我哋同胞富起來，鍾意收藏中國油畫，你要順住市場大勢至得。」喂，中國油畫又話多假貨，點算好？藝術Ｐ話：「我真係領過幾次嘢，所以𠵱家乜都唔信，總要自己睇完又睇，搵行家睇多幾次。內地做假畫，成行成市，有一條龍服務，先由冇名氣嘅畫家臨摹真跡，佢哋可以畫到同真品冇乜分別，然後拍埋錄像，搵有資歷（可能都係假嘅）嘅驗畫專家出示真跡證明，外行人冇法子唔信。我都係碰過釘，親身識到一位專造假畫嘅畫師，睇過佢點樣開始，然後先至寫個服字。」
據藝術Ｐ講，呢位畫師同大畫家都係自藝術學院畢業，但同學老早成名，自己無人瞅睬，故此以臨摹當真跡為生，真到連佢同學都一時之間分唔出。於是生意甚好，唔使憂柴憂米之後，自己就創作啲新畫畀藝廊展覽，逐漸被收藏家受落，故此現已停止製造假畫，希望憑真實力打出名堂。藝術Ｐ講：「畫家與藝廊係要互相依靠嘅，你畀畫我展出，我替你吹捧宣傳，賣得出嘅話，可以貨如輪轉，互惠互利。」係噃，未成名之前，畫家當然要做吓marketing，低價向畫廊求售，浸吓時間，先可以希望捱出名堂。藝術表面係清高事業，實則仍然係一盤生意。要清高，等你成為畢加索就可以講到夠。