1984年，中英雙方就香港問題達成協議，簽訂聯合聲明；同年，蘇民峰跟前輩吳晚軒學滿師，開壇批命。就這樣，一位風水專家的半生命數與香港前途互相重叠交錯。風水好，香港好；香港好，風水佬更好。 記者：蔡元貴
十年來，蘇民峰見證得太多浪花淘盡英雄事，有點麻木了。他說，過渡期經濟太好，樓股有升無跌，全民進入不理性的亢奮狀態，人人變得浮誇虛幻，97年跌市，很多人接受不了現實：「有個客，廿幾歲仔，失咗業，上來問我點算。我話人有三衰六旺，叫佢腳踏實地，由頭來過，從低做起。佢唔理我，碌卡度日，結果搞到破產。」
「我鬧啲客，叫唔好發夢」
在特區第一任特首董建華統治下，失業率屢創新高，樓市積弱不振，破產與負資產人數可填滿過百間青山醫院：「嗰時最多人上來問我點翻身。人人都想走精面，唔肯面對現實。大佬，我唔係神仙呀！我係咁鬧啲客，叫佢哋唔好發夢。」
回歸初年的蕭條，蘇民峰說是一次磨練：「從客人嘅態度睇得出，經歷咗咁多嘢，港人已經學會腳踏實地。佢哋唔再淨係識得問我點樣發達，反而多數問啲實際嘢，例如健康。」
港人迷信成性，董建華公開以風水理由拒絕入主禮賓府，繼任的曾蔭權不想予人迷信形象，卻也鬼鬼祟祟找來幾十年老友兼半退休風水師龍景銓睇風水。港人甚麼都八卦一餐，破了產，會問蘇民峰幾時翻身；染了病，又問蘇民峰幾時康復。
「沙士時個個戴口罩出街，睇相都戴住，都唔知點同佢睇，好好笑。」他邊笑邊憶述，那時「如何避免感染沙士」是堪輿顧問的必答題：「有個孕婦問我，邊間醫院開刀穩陣啲，我惟有根據方位推測，叫佢唔好揀啲東南方位嘅醫院，例如沙田區。結果我叫佢去浸會，點知後來浸會都發現有沙士病人！」
「會展新翼似粒瘡哽住晒」
英國人離開後，香港的運數似乎特別差勁。坊間流傳，是因為97年落成的會展二期設計累事；酷肖龜形的會展新翼構成「靈龜出海」格，敗壞香港氣數。
蘇民峰說：「香港喺87同93兩年都有股災，唔係回歸之後先有低潮。」但他同意會展新翼累事，「會展最衰！我上堂都用來做教材。打開地圖睇吓，維港兩岸，尖沙嘴同灣仔本來可以cup埋一齊，點知多咗會展新翼，成粒瘡哽住晒，影響社會和諧，所以先咁多示威請願。」
風水算命並非回歸後才流行：「我出道嘅年代（80年代）已經好流行，淨係一條砵蘭街已有三五七檔，咁我先至會去學。」以前新聞很少觸及堪輿八卦，97後報章雜誌訪問玄學家變得普遍：「唔係因為回歸後港人迷信咗，而係新一代命理學家作風比較開明，立論比較講究科學根據，容易得到大眾接納。」
如果說風水影響經濟，則香港盛衰也主宰批命師傅的行業升跌：「89民運之後影響最大，嗰時臨近回歸，個個驚住香港就來冇運行，觸發移民潮，啲客走晒，少咗好多生意，對我哋打擊好大。」
回歸後，又有兩次衝擊。1998年樓市大瀉，蘇民峰生意停頓下來：「冇人買樓，邊度有人睇風水？」2003年的沙士，開班授徒的他說：「好多學生報咗名都唔敢來，來嘅都戴口罩上堂，嗰次經歷真係好深刻。」
受惠於自由行，城中幾位風水師傅近年風生水起：「內地客帶旺成個睇風水市場，𠵱家個市場大到你唔信。我有十幾個學生出咗來做算命，佢哋都有北上幫人睇風水。」他說，有位廿多歲的徒弟本來在內地開廠，後來結業，改行在大陸算命，收入不錯。
物極必反，否極泰來。「社會經濟有循環，個人運氣有高低。好景時積穀防饑，低潮時腳踏實地。」蘇民峰十年來看盡人間風雨陰晴，變幻原是永恒。
回歸10年倒數78日
