雷丁近況差到痹，但畢傑就係貪佢哋6場不勝，周六英超主場對富咸，等咗呢個「反底」機會好耐嘞，話之你富咸護級大過天，我夠要爭歐協盃席位咯，我揀雷丁W！畢傑
畢傑好早已經講過，富咸最大弊病係防線不穩，前領隊高文今季將擅守嘅禾斯轉打右中，反而將有速度兼有助攻力嘅羅仙尼亞打右閘，兩個球員位置互調，經已係一敗筆。
富咸臨陣換教頭
最近高文又明知羅仙尼亞助攻意欲強，成日唔安守本份走咗上前場，將羅仙尼亞轉打左閘，但係防線咪成日失波囉。我係領隊嘅話，寧願擺保卡尼加或基斯坦禾打左閘，起碼「塞」住個防線先嘛。
富咸唔經唔覺7場不勝跌落15位，同尾3嘅錫菲聯只差4分，護級漩渦捲到埋身。前線嗰啲冇晒活力，蒙廸拿、拉辛斯基同麥比廸個個「三張幾」，中場負責掃蕩嘅隊長米高布朗都成30歲，成班波一旦失球在先，仲邊度有力打翻身戰？
高文日前終被炒，不過球隊喺季尾呢個時候突然換教頭，由北愛領隊山齊士兼領軍，雖然話護到級，山齊士可坐正兼加6倍人工，亦肯定唔係好決定。
雷丁生牯仔有目標
雷丁嗰邊就唔同得多，列達、奇雲杜里、沙恩朗同薛維爾全部廿零歲，最重要係雷丁𠵱家雖然排第9，但距離第6位嘅愛華頓都係差6分，仲有機會爭歐協盃資格，斷估唔會放水畀富咸。
冷選方面，揀咗場法甲華倫西恩斯主場砌低馬賽。馬賽其實只係贏名氣，上場大炒里爾4:1，今場肯定成聚飛球隊；不過球迷唔好齋睇個比數，就覺得馬賽回勇，事實係上場佢哋多數靠角球混戰同12碼先贏得咁輕鬆，實質冇乜靚組織。加上馬賽近13場作客淨係贏過1場咁大把，我會揀華倫西恩斯坐和望贏囉。
投資特攻隊金句
富咸喺季尾呢個時候突然換教頭，由北愛領隊山齊士兼領軍，肯定唔係好決定。
熱選 大藍籌
星期六18
主客和
雷丁勝(1.83)
評語：雷丁個個有氣有力，富咸就啱啱炒領隊兼老將多，主W熱啲唔怕捧。
冷選 23線股
星期六57
讓球
華倫西恩斯(平)(1.94)
評語：馬賽只係名氣大，華倫西恩斯主場不嬲硬淨，贏埋你唔奇。