新一輯嘅《逆轉裁判4》終於推出，今次唔再係翻叮GBA版，而係NDS版原創故事，而主角就變咗做新晉律師王泥喜法介，至於頭三集嘅主角成步堂龍一，今次唔單止無得做律師，仲搞到頹頹廢廢被捲入謀殺案中，掉番轉頭要搵人幫佢打官司，真可悲。
玩法同以往一樣，都係搜集證據然後上庭打官司，不過第二、三集可以睇穿人隱瞞事實「勾玉」系統就取消咗，取而代之嘅係睇穿人內心影像嘅「心眼」系統。各種應用TouchPen同收音咪嘅玩法仍然保留，各位可以繼續用筆掃指模搵證據，亦可以對住NDS個咪大嗌「Objection!」過足癮，而最正當然係可以任揀英或日文版本，唔使因為睇唔明日文而玩唔到咁掃興。香港行貨暫時只有普通版，想買送埋DVD及事件簿嘅限定版就要幫襯水貨囉。
機種：NDS
推出日期：4月12日
類型：偵探
廠商：Capcom
售價：$288（行貨）
