對上4季3奪德甲桂冠嘅拜仁喺歐聯8強俾AC淘汰，肯定唔見一大筆，為咗重建球隊同穩定財政收入，球會決定高價放走夏格維斯，睇吓有冇水魚上釣。
似過最佳出售時機
拜仁喺歐聯出局，為捲土重來已開始為下屆組軍。佢哋用高賣低買嘅換血政策，歇冬時以120萬歐元簽入亞琛前鋒舒拿達夫，同免費購入史浩克中場咸美艾天托普，會喺今夏正式加盟；喺輸俾AC後，高層碧根鮑華亦放風話想以2,500至3,000萬歐元（約2.6億至3.2億港元），賣走26歲嘅夏格維斯套現。
夏格維斯喺世盃表現出色，吸引到曼聯等大球會欲高價羅致，惟拜仁死都唔賣。但當日最想要夏格維斯嘅曼聯，經已有個越踢越好嘅卡域克，加上夏格維斯季初斷過腳同表現麻麻，我求大俠好懷疑邊間球會會落搭。
拜仁緣盡歐聯，可以叠埋心水爭聯賽。但今屆佢哋超唔爭氣，長時間俾史浩克同不來梅領放，而且成日累捧場客。𠵱家冇咗歐聯枷鎖，希望喺餘下嗰6輪聯賽，做番齣好戲啦！