入行十幾年，在香港、內地和台灣等地均發展過的孫耀威，經歷過不同的人生起跌，但臉上總看不到一點痕迹。天生含「防腐劑」，加上樂觀的性格，令孫耀威長久保持身、心年輕。事隔九年重返香港樂壇，面對別人冷言冷語只一笑置之，心口掛着勇字高呼：「我係打不死嘅曱甴。」
八、九十年代的歌手再度活躍歌壇，除了草蜢、呂方等人外，之前一直在台灣、內地主攻拍劇的孫耀威，早前與車婉婉合唱《再見亦是戀人》後，最近決定重返本地樂壇，簽約唱片公司並計劃於五月推出新碟。
「鍾意做咪做囉」
相隔九年沒有推出廣東碟，孫耀威自言是九年人事幾翻新，從前是樂壇的小朋友，現在已經變成前輩歌手，不過他卻不計成敗，只享受出碟的過程。
雖然有人潑冷水不被看好，但孫耀威性格樂觀，更自稱是打不死的曱甴，他說：「有人覺得我好戇居，人哋發展內地市場，但我就返嚟扎根。好似當初拍劇，有啲導演覺得我啲戲唔好，係咪唱歌唔掂先至走去拍劇。我唔嬲，咪一步步去改進囉。其實我又未死，鍾意做咪去做囉！其他人嘅批評，聽完就用自己智慧諗吓邊樣啱。」
聞臭丸保青春
在娛樂圈打滾多年，算是孫耀威的優點，他說：「𠵱家把聲唔同咗，感情都豐富咗，直情係情場浪子鬼見愁，係個男人。」內涵多了，但孫耀威的臉上不留歲月痕迹，難道有防老的獨門秘方？他笑說：「我係防腐劑！聞吓臭丸囉！我偏向樂觀鍾意笑。以前啲人問我做乜經常笑，又話我似白癡冇腦，但唔笑唔通喊咩？而且我都唔會做facial，打針嗰啲唔使喇，男人唔使用㗎！」
採訪：王連連
攝影：陳俊強
髮型：Sunny@HairCulture
化妝：YenLai
服裝提供：Diesel
Stylist：CeliaWong
場地提供：Aluminium
