時間：96年
地點：清水灣電視城
人物：盧海鵬、沈殿霞
經過：要數娛樂圈歷年至爆笑、至經典嘅扮嘢高手，相信盧海鵬認第二，都冇人敢認第一。就睇當年肥姐見到盧海鵬扮佢愛女欣宜之後，笑到當眾失禁，就知道盧海鵬嘅扮嘢功夫有幾厲害。
80年代，冇乜邊位紅星藝人冇俾盧海鵬扮過，好似羅文、盧冠廷、徐小鳳、黃耀明同肥姐咁，個個造型都令觀眾笑到碌地，回味無窮。記得96年嘅《萬千星輝賀台慶》，盧海鵬喺螢光幕扮欣宜，當晚佢着住一條粉紅色裙，蹦蹦跳扮可愛出現，一出場觀眾已笑到肚痛，身為司儀嘅鄭裕玲，亦笑到失控碌喺地下。不過，點都唔及肥姐激烈，佢唔單止笑到肚痛，仲笑到失禁，成為歷年台慶至經典至爆笑場面。之後97年肥姐錄影《公益開心果》節目，亦笑到幾乎失禁，好在當時因為係錄影，肥姐即時叫停機趕去廁所，冇令歷史重演。
事實上，自從舊年10月肥姐接受肝腫瘤切除手術後，大家已經好耐冇喺螢光幕度聽見肥姐嘅招牌笑聲，希望佢早日康復，繼續再帶歡樂笑聲畀大家啦！
本欄逢周一至周六刊出