正喺布拉格拍攝科幻新片《BabylonA.D.》嘅楊紫瓊，前日俾外國狗仔隊影到佢拖住一個小朋友行街shopping，話嗰個係佢囝囝，同行仲有楊紫瓊助手同小朋友嘅保母。
想跳進車尾箱
當日楊紫瓊唔使開工，佢同呢位年約4歲嘅小朋友去到布拉格一間舖頭買衫，之後又喺玩具店買咗架小型電單車，楊紫瓊全程拖住小朋友隻手，顯盡母性。睇嚟小朋友對禮物愛不釋手，當楊紫瓊同助手將佢哋嘅戰利品擺入車尾箱時，個小朋友竟然想跳埋入車尾箱度，令楊紫瓊笑不攏嘴。
楊紫瓊早前宣布拍完呢套戲之後，將會同法拉利車廠總監未婚夫JeanTodt拉埋天窗，不過馮仁昭從來冇聽講過佢有個囝囝，究竟呢位小朋友係乜嘢身份？馮仁昭噚日向楊嘅另一位助手詢問呢件事，助手話楊紫瓊𠵱家喺布拉格，暫時未聯絡到佢回應。