59歲的汪明荃雖然做阿姐做足幾十年，但仍然不斷增值，力保阿姐地位，今次她到日本京都拍攝《向世界出發》，便跟隨頂級大師學習能劇和舞踴，令她回憶起37年前到日本學藝時，雖然家境欠佳，其父仍籌措了8,000元給她作生活費，這份慈愛恩情，至今仍令阿姐感動不已。 撰文：戴彩煥
汪明荃早前到日本京都為《向世界出發》取景，參觀了多個世界文化遺產古蹟，包括有1,200年歷史的清水寺、日本三大神社之一的上賀茂神社、400多年前由幕府將軍德川家康擁有的城堡二条城、京都現存唯一的朝廷官邸「冷泉家」，以及參與八坂神社的「節分」等等。
不過，最令阿姐印象難忘和興奮的，是有機會向古典舞踴流派「若柳流」傳人學習傳統舞踴，及跟隨能劇大師橋本光史學習被日人視為國寶的能劇，她說：「能劇最特別嘅地方，就係唱歌嘅聲線好沉厚，壓到好平，同我哋廣東粵劇好唔同。」37年前，阿姐為充實自己，曾隻身到日本學習歌舞，今次舊地重遊，不禁令她百感交集。
父子傳承 感動
提到已去世的雙親，阿姐說：「第一次嚟日本學跳舞嗰陣，我哋環境唔係咁好，但爸爸都畀咗8,000蚊我，當我收到屋企第一封信嘅時候我就喊，今日再嚟到日本，睇到一啲傳統演出，係爸爸傳畀仔，或者係媽媽傳畀個女，我又諗起我喺佢哋身上學到啲乜？繼承咗乜嘢？我好懷念我爸爸嗰種正直，對家庭嘅熱愛；我亦好敬佩我媽媽，為咗家庭付出一生嘅努力，雖然我從來都唔喺傳媒面前講我哋屋企嘅事，但我真係以佢哋為榮，希望我哋將來喺另一個世界會面時，我哋會比喺地球上嘅相處更加融洽。」
學習舒懷 坦蕩
節目中，阿姐還提到羅家英如何將她這座冰山劈開，她說：「初初好辛苦㗎，你會覺得佢唔尊重你囉，即係譬如你有啲乜嘢，佢又巴啦巴啦喺報紙度講，喂，大佬你尊重吓我，呢啲係我自己私隱，咁佢嘅道理就係，我係坦蕩蕩，我無嘢唔可以俾人講，咁我慢慢就覺得，係喎，香港人都認識咗我幾十年，算啦，都唔緊要啦！佢自己好有性格，佢大大細細都啱傾，呢個係佢好嘅地方，我最欣賞佢永遠知道自己企喺乜嘢位置，佢冇錢唔緊要，佢咪住間細啲嘅屋囉，佢唔會去充，永遠知道邊個係大哥，唔會搶人風頭，恰如其份，我覺得呢樣嘢好緊要。」
撰文：戴彩煥
汪明荃《向世界出發》之「古都藝影」將於下周一10:35pm翡翠台播出。
