徐悲鴻一幅油畫，以七千二百萬元賣出，不知名嘅收藏家可說發大達，只恨自己幾十年前周身冇蚊，又唔識藝術價值，否則去廣州、杭州搜購一批字畫，今日可以印印腳長嘆咯。
學生Y好聰明，指住《蘋果日報》問藝術B：「點樣先知道一幅畫有冇藝術價值？」藝術B答：「唔，可以講番一堂，先講藝術意義，然後至講價值……畫家背景，時代背景，畫工，畫題皆有其獨特之處……」學生B話：「好悶喎，聽唔明，我剩係想知點解徐悲鴻幅畫值咁多錢啫？」左丁山插嘴：「咁就要學吓經濟學概念，物以罕為貴，一幅畫就係一幅，冇第二幅，全球稀有，故此有『稀有價值』（scarcityvalue）……」惡佬明又插嘴：「譬如打牌，一隻一筒好閒啫，未必有價值，但當你做十三么，單吊一筒，而枱面已有三隻一筒打出咗，咁呢隻一筒嘅價值大咯……。」
學生Y聽到笑起嚟，大編輯立即澄清：「隻一筒有價錢啫（price），唔好混淆咗價值。你自摸一筒，食出十三么，收好多籌碼，呢樣係價錢，但自摸一筒帶畀你極大歡愉，因為你從未試過咁好運，呢樣就係價值嘞。」學生Y俾啲大人講到暈陀陀，佢話：「我只係想知道徐悲鴻幅畫點解咁值錢啫，使唔使讀埋經濟學呀？」左丁山話：「當然要，你明年入咗大學，無論主修邊科，都要修一科經濟學一○一。」
講起經濟學，大編輯就為之悵然，佢嘅母校浸會大學傳聞話要殺系──經濟系，將經濟系併入商學院課程，但唔聽見有人反對。惡佬明話：「殺系咪殺系囉，我哋土木系一早殺咗啦。」呢啲係陳年舊事咯。經濟系校友幾難反對殺系，因為讀經濟學嘅人，點都相信供求理論及市場自由運作，假如浸大經濟系不如商科咁受歡迎，學生唔選讀（即係需求低），係大勢所趨噃，有乜好反對？故此大編輯聽見母系將被吞併，被消滅於無形，都唔知點反對，只好約啲同學返去浸大經濟系招牌之前影番幅紀念相。而系主任鄧樹雄亦心灰意冷，預備系亡人退休，冇眼再睇。