足球博彩賭盤五花八門，夏佳理先生喺當日足智彩推出時亦講過：「甚至連邊個球員用邊隻腳入波先，都有得賭！」雖然目前足智彩仲未有呢樣過癮嘢玩，但外圍亦已有唔少甚受歡迎嘅另類賭盤，好似對賽兩軍邊隊先開波咁。
就咁睇，邊隊開波先，完全冇得估㗎喎！其實情況咪又即係等於「單雙」、「大細」、「讓球」咁，結果都係喺兩瓣入面是但開一瓣。不過，又咪以為揀邊隊開波先，兩邊水位會係一樣喎，竟然經常出現某一隊會低水啲，唔夠1.9倍，另一隊又可以有接近兩倍回報！
一日有波賭，就一日有人會話有「假波」；其實好似呢類邊隊先開波盤口，雖然據保頓隊長中場路蘭所講，自從出現咗呢種玩法後，對賽兩隊嘅隊長喺開賽前，於場中間擲毫決定開波先定揀場先呢樣嘢，已經改變為擲贏一方只可以揀場，唔可以揀先開波。
出蠱惑唔係冇可能
但其實相對於英超、歐聯等規模較細嘅聯賽或盃賽，你話執法球證同兩隊隊長要夾埋開出「公」定「字」，都唔係冇可能噃！
十賭九騙，看官將來如果有機會接觸呢種「先開球」項目，建議咪貪心敲高水嗰邊，反而應多向低水嗰隊埋手。畀你係可以「控制」到結果嗰個，都會寧願向瓣較低水位嘅派彩啦！文：華度