李嘉欣同許晉亨拍拖將近一年，依然煙韌，近來嘉欣工作量大減，日日同許公子秤不離鉈，前晚呢對萬能膠情侶又再出擊，齊齊到中環蘭桂坊酒店開餐。
香閨短敍15分鐘
日前嘉欣冒雨拍拖唔小心跣親，撻到八月十五開花，難怪前晚佢同許公子用膳後，10點左右離場時，打扮斯文、腳踏高跟鞋嘅嘉欣行路特別小心翼翼，同身穿筆挺老西嘅許晉亨十指緊扣，漫步到街頭上車。
問嘉欣去邊度食飯？佢即時黑面，許公子就笑而不答，繼續拖實女友登上佢部配上「AH1」、諧音「阿一」車牌嘅舊款賓利（Bentley）房車，由司機接送到女方渣甸山香閨。嘉欣上車時正襟危坐，仲騷出佢右手中指佩戴嘅大粒鑽戒，但司機一開車，佢連隨黑氣盡消，同男友喺車廂黐埋一嚿，其後許公子喺女友香閨短敍15分鐘，至坐車返花園台寓所。
馮仁昭記得嘉欣舊年36歲生日時，舊愛劉鑾雄（大劉）以署名「TheOne」登報賀伊人牛一，冇幾耐許公子就出咗「ME2」車牌。有趣嘅係大劉有個「CC1」車牌，前晚許晉亨就晒個更勁嘅「AH1」車牌，配約價170萬嘅賓利房車嚟襯佳人。話時話，仲有兩個月就到嘉欣生日，唔知到時許公子又會有乜冧女板斧呢？
