時間：99年9月
人物：高菲菲
地點：香港某公園
經過：老公有外遇，有啲女人會選擇啞忍，希望老公回心轉意，但有啲就會企出嚟捍衞家園，力保大婆地位。好似雷冠賢太太高菲菲咁，當年佢使出一招踢狐腿，真係令人聞風喪膽！
99年，韓君婷同銀行家雷冠賢傳出緋聞，由於佢哋兩個經常俾傳媒影到出雙入對，男嘅又被影到送女方返屋企，緋聞越傳越盛，搞到雷冠賢住喺美國洛杉磯嘅太太高菲菲，忍唔住即刻飛返香港昅實老公，當住記者面前要佢老公同韓君婷劃清界線。
擘一字馬騷哥利
唔單止咁，幾日之後，高菲菲仲將行動升級，佢接受傳媒專訪時，仲擘一字馬同施展踢狐腿，喺傳媒面前展示佢嘅非凡身手。唔講唔知，原來高菲菲做過一年解放軍，又係「體操王子」李寧師妹，佢喺傳媒面前猛騷哥利，試問有邊個仲敢接近佢老公吖！
雖然高菲菲施展踢狐腿之後，雷冠賢同韓君婷嘅緋聞真係絕咗迹，但對雷冠賢同高菲菲呢段有裂痕嘅婚姻毫無幫助，喺2000年初，盛傳佢哋婚姻亮起紅燈，同年8月，佢哋雙方終於向傳媒承認離婚。
本欄逢周一至周六刊出