早前預告今個夏天以性感形象示人的林子萱，日前以一身密實打扮，由助手陪同到灣仔車行睇車。當日她主攻看七人房車，更對一輛價值26萬的ToyotaEstima七人車情有獨鍾，還親自試坐。事後林子萱表示因每月單是租車費及的士費已達五位數字，故有意購買保母車代步省錢。
林子萱曾先後與谷德昭及「鋼琴王子」陳雋騫傳緋聞，可惜在樂壇發展平平，難怪早前她揚言要以性感姿態強攻夏日市場。日前是復活節假期，林子萱偕女助手到灣仔告士打道一間車行睇車，適逢當日寒流襲港，故林子萱也收起豐滿身材，以大褸保暖。
難捨愛車
約下午5時許，林子萱現身灣仔富利堡車行，並對櫥窗內一輛價值26萬、淺藍色ToyotaEstima七人車甚感興趣，與女助手研究車身外觀之餘，還親自試坐。只見林子萱輕撫車身，顯得愛不釋手，之後又與車行職員密密斟，看來是詢問有關房車的價錢及性能。
雖然最後空手離開，但林子萱離去前仍再三細看愛車，步出車行時又跟職員在門外手指指，似乎對心頭好依依不捨。
事後林子萱接受電話訪問時，直認有意買保母車代步，她說：「因為我平時出入都係靠租借保母車同搭的士，計計埋埋每個月都要成五位數字，搞到我欠公司越嚟越多錢，而且五位數字基本上可以供到一部車，加上我近日工作多咗，所以先有買架保母車嘅念頭。不過我就想要深藍色多啲，如無意外儲多兩個月錢，我應該6月就可以出車喇。」
願做司機
其實現時林子萱已有一輛大Jeep，但因與家人共用，故頗不便，加上她缺乏強勁唱片公司作後盾，所以就連出席活動的代步工具都要靠自己想辦法。林子萱說：「冇所謂啦，如果第日要供車就未必請到司機，自己揸埋做活動咪仲有型囉！」
採訪：駱華齡
攝影：陳順禎
