提起越野四驅，就令人諗起攀山涉水、沙塵滾滾，可謂熱血男人專用車款，不過四驅之王LandRover剛到港嘅Freelander2，就可算顧及埋女士嘅感受；高視點、易操控及備有安全落斜系統，唔會失控標落山，就算嬌滴滴甚至技術麻麻嘅女士，都可輕鬆駕馭呢架大牛龜越野車！
記者：周達之
攝影：伍慶泉
模特兒：Brad、Fiona
女仔點睇？
平時揸車最煩惱係睇位難，Freelander2車身夠高，睇位容易得多。落斜坡時，唔踩Brake都可以慢慢行落山，呢點就最緊要，因我以前試過由山頂揸車落金鐘，因踩Brake過度而傳來燶味，真係嚇破膽！
落斜安全無難度
女仔之家揸Freelander？唔奇！皆因呢部Freelander2雖然大大部，但並非肌肉型，女仔揸亦唔突兀；一坐入去，內櫳廣闊、視點夠廣夠高，睇位超容易，最吸引係佢嘅落斜模式，即使陡峭斜坡亦同樣如履平地，對揸慣自動波嘅女仔就更合用。
一般自動波車落斜嗰陣會由得部車向前衝，如果司機一味踩住個Brake就肯定會Overheat，好危險！對揸車稍有經驗嘅會拖落低波用引擎制動（俗稱EngineBrake），但過份踩Brake嘅危險性仍然存在。Freelander2嘅落斜模式就交由電腦控制波段及制動，可以好安全咁落斜。小記就喺相思灣一段大斜路試車，採用落斜模式再加「草地/碎石/雪地」模式，發覺一落大斜路架車就會自動轉用低波兼自動控制埋制動，小記隻腳完全無掂過Brake，依然可以喺好安全嘅車速下落大斜路，勁！
因應環境變更抓地力
Freelander2另一個引人地方，就係TerrainResponse系統，主要分為「一般」、「草地/碎石/雪地」、「泥濘與凹陷」同埋「沙地」四個模式，可因應環境而切換，務求得到最大嘅抓地能力。喺On-road環境，用一般模式已經夠玩，小記試過喺馬路用其餘嗰三個模式，結果反而拖慢架車嘅表現。
之後驅車直奔沙地，一般車可能早已拋錨，不過Freelander2依然長驅直進，再試試轉去沙地模式嚟起步，發覺果然無一般模式咁易打滑，抓地力明顯更高。
毋須就住上壆
離地210mm嘅高車底及四驅設計，令佢行走高低不平嘅崎嶇路段時仍然可以如履平地，就算係平時喺市區揸，高車底行過停車場等有矮壆嘅地方亦唔使太過就住。懸掛方面，小記覺得佢比上一代較硬，可能廠商想兼顧On-road表現多啲，始終大部份用家都係城市人，平日都係行市區路居多。
順帶一提，NCAP喺今年撞擊測試報告裏，喺成人防護測試畀Freelander2五星滿分，相信呢點將吸引唔少買家。
男仔點睇？
小記一向係實用派，部車可以上山下海唔係好關我事，加上我雖然靚仔但未有女朋友，如果要我日日自己一條友揸住部3,000c.c.嘅車會好唔化算，所以呢架車就正如俾我拒絕過嘅眾多靚女一樣，唔係話佢唔好，只係唔啱我咁解嘅啫。
個人覺得新款Freelander2的TerrainResponse系統也值得一讚；在試車途中，我曾開着車子走到沙灘，並把系統撥至沙地Mode，發覺車子的對地抓着力恰到好處，不怕泥足深陷呢！
抵讚：
TerrainResponse及落斜模式將所有崎嶇路段及斜路變成平地。
要彈：
喺香港嘅實用價值唔係太高，花咗錢買咗啲用唔着嘅功能。
LandRoverFreelander2規格
引擎：3,192c.c.直列六缸24氣門
馬力：233hp/6,300rpm
扭力：32.3kgm/3,250rpm
傳動：全時四驅、6前速自動或手動
懸掛：（前）麥花臣/（後）四連桿
車重：1,770kg
車輛提供：越野路華香港（27132383）