有日揸車載住細佬樂祥同細妹娛思，喺紅隧出嚟經新銅鑼灣天橋去銅鑼灣唱K嗰陣，爭啲俾個行人嚇到我彈起之餘，仲踩Brake踩到嗌救命！
我仲好記得，嗰晚新銅鑼灣天橋嘅交通好暢順，跟住見到彎位同地下嗰啲黃色減速線嗰陣，已經將車速收慢入彎，點知落到底先見到有斑馬線存在，而且仲要有人過緊馬路㖭！當我哋雙方發現對方突然出現之後都打咗個突，我就惟有踩實個Brake嚟煞停部車，而嗰位行人就跑快兩步走過對面，最慘就係我後面仲有車行緊上嚟，個司機見到呢個情況都要緊急煞車，如果唔係？哈哈！
講真吖！香港其實有好多呢類陰濕斑馬線或燈位，例如葵福路天橋往葵芳方向一組燈位，同埋屯門青田路同震寰路路口嘅行人過路線等等，呢啲燈位同斑馬線都係設喺斜路底，又或者係嗰啲高車速路段嘅出口，雖然有交通標誌提醒駕駛者，但由於車速較高又或視線容易受阻，要駕駛者睇到是否有行人正在使用有關過路設施，真係都幾難。倒不如增設更多交通標誌提示駕駛者，又或索性將有關過路設施搬遠些少，咁對行人同駕駛者都可以安全啲吖，係咪？
悠穎馳
豪邁不羈，愛車如命，聽幾下引擎聲就知咩車！