溫家寶昨日到日本訪問，中外傳媒注目，有線電視早已派出皇牌新聞主播張宏艷到日本訪問各界，連日播出，都幾好睇。張宏艷喺九三年自中大新聞系畢業，立即俾有線搶咗，做新聞主播，不少觀眾有驚艷之感。𠵱家張宏艷已生下三名孩子，仍然保持得咁靚，家計會應該搵佢做代言人，鼓勵香港女性生多幾個，提高香港生育率。
張宏艷到日本，如魚得水啦，事關佢曾經攞日本文部省（教育部）獎學金，到慶應大學讀碩士。慶應大學校園內，最多外國靚車，因為學生之中，唔少非富即貴，有錢仔女之多，全日本大學第一。張女士識得日文，到日本採訪梗係着數到極，何況慶應碩士銜頭喺東京夠晒照，可以開到好多門㖭！
四月九日有線播出張宏艷訪問著名漫畫大師弘兼憲史。講佢四十年前喺早稻田讀書，學生受中國文革影響，崇拜毛澤東，現在思想有改變，主張日本擴軍，但反對任何戰爭。睇完剛好接到肥仔K電話，同佢講起，肥仔K話佢九年前睇弘兼憲史漫畫，由《課長島耕作》睇起，到《部長島耕作》，到現在嘅《取締役（董事總經理）島耕作》，覺得弘兼憲史逐漸亁塘，講島耕作派往上海，了解中國商界，講到商界內黑白二道難分，商人意見不合，就會沉屍黃浦江底，類似日本小說內黑社會將仇人放在黃麻包內，掉入東京灣一樣。肥仔K話弘兼憲史筆下之島耕作，以前多講公司鬥法、經濟事務，𠵱家就似寫奇情驚險小說，失去原來風格，所以肥仔K已經唔再睇。
弘兼憲史係日本嘅中間偏右派，主張擴軍，但對中國冇太大敵意；右派就係否認南京大屠殺、參拜靖國神社一類。左派呢？人數較少，左派親中學者比較集中在早稻田大學，慶應大學多亞洲派，即主張「東亞或亞洲共同體」一派。至於經常上電視評論日韓、日中關係嘅一位學者姜尚中，係第二代韓裔日人，屬每事必有答案一類，係日本傳媒寵兒。