嚟到季尾，護級球隊為咗救亡，真係要豁出去；好似英超嘅富咸同西甲嘅切爾達就齊齊換帥，分別搵嚟國家隊級教頭山齊士同史杜捷哥夫幫手，希望搏埋餘下幾場波，祝兩隊好運。
富咸炒領隊高文，多少都有啲意外，話晒高文近10年都為富咸賣命，亦係踢而優則教典範；但富咸真係好似發波瘟咁，近7場只攞3分，上仗主場輸畀曼城，搞到跌入降班漩渦。富咸今次搵到北愛爾蘭領隊山齊士做看守領隊，直至季尾；山齊士帶北愛真係勁，以呢支一向屬英倫三島魚腩嘅球隊，竟然排係歐國外F組首名，仲贏過西班牙同瑞典等勁旅。
切爾達就搵咗保加利亞名宿史杜捷哥夫，頂替華斯基斯個教練位；原本史杜捷哥夫踢過巴塞隆拿，對西甲一啲都唔陌生；但呢位左腳王教波就認真唔掂，原本帶緊保加利亞國家隊，但喺歐國外G組只列第3，出線機會唔高。史杜捷哥夫就立即「跳船」，唔做保加利亞國家隊教練呢份工，留低爛攤子畀下一手教練。
我求大俠覺得兩個雖然都係國家級教頭，但山齊士履歷好過史杜捷哥夫，睇嚟富咸護級前景好過切爾達。