小記自問是個欺善怕惡之流，有時喺單程路遇上對頭車，如果部車又殘又鵪鶉，小記諗都唔諗就會兇對方叫佢讓車！但假如對方部車夠型又夠狠，小記又會諗都唔諗自動讓車。唉！人就係咁，不過從中亦悟出一個道理，就係部車夠威猛點都會着數啲，就好似呢部標致407Coupe咁，本身已極度威猛，佢老哥仲嫌唔夠惡，要喺車頭兩邊加上虎虎生威嘅鯊魚鰓，睇起上嚟十足十喺公路行走嘅虎鯊，試問有邊架車夠薑唔讓路！
記者：周達之
攝影：陳偉強
路有惡鯊速速迴避
一眼望見嗰3間鯊魚鰓，小記已斷定407會成為話題之作。老老實實，部車車頭本身已經有咁大個吸風口，你話嗰幾條窄窄鯊魚鰓對個迫力有好大嘅散熱作用咩？小記打一句問一句都唔信，不過就正正係呢3畫神來之筆，令到部車增添唔少霸氣，賣貴幾萬銀都仲得，所以話Design呢家嘢就係值錢在呢度。
407Coupe美妙之處當然唔單止個鰓，一對頭燈亦刻意造到瞪眼戚眉，大燈喺正中央似足一對眼珠，呢下畫龍點睛賦予407Coupe懾人嘅生命力，真係行近啲都驚俾佢噬一啖！
車身矮貼住頭頂
低矮車身成粒子彈咁嘅外形確吸引，不過小記第一眼望上去覺得車頂似乎矮咗少少。果然，一坐上司機位就覺得車頂壓頭頂，即使將座椅調到最低仍然有種壓迫感。但話分兩頭，407Coupe既然係跑車，各位當佢係法拉利咁瞓低少少嚟揸，感覺會Fit番！而另一個要挑剔嘅地方係佢粗闊嘅A柱同三角窗，或多或少會阻擋視線，而車內倒後鏡後方嘅雨點感應器，亦係幾礙眼。
不過講到內櫳就認真無話可說，真皮暖氣座椅，碰啱拍攝當日氣溫驟降，暖住個PatPat嚟揸嗰種感覺十分暢快，前座略帶桶式嘅座椅令轉彎時有更好支撐。後座只坐兩人，所以空間相對寬闊，中間設有把手兩側有杯座，加上車身較長，半卧半坐有種好Hea嘅感覺。車頂設有骨子嘅電動天窗，滲入自然涼風及清新空氣，加上240Watt、10個喇叭嘅JBL音響組合，若果身旁有埋靚女相伴的話……唉，點解今次老編話唔要Model㗎？
運動模式片彎更盡
211匹嘅3.0V6引擎唔可以講得上令人雀躍，話晒部車都有成1.7噸重，但都唔會太過失禮。採用咗VVT技術，可有效改善汽油燃燒，廢氣少啲，油亦用少啲。坐上407Coupe，行車時出奇地寧靜，即使轉速到達二千零三千轉時亦絕對唔係嘈生晒嗰隻，雖然唔排除有啲人係越嘈越鍾意，但我仍然喜愛407Coupe惡得嚟內斂嘅感覺。
407Coupe設有懸掛硬度調校按鈕，一按之後路面感覺即時由腳底傳上頭頂，雖然係震咗啲，但喺上山彎路一段使用時可減低離心力，唔使左Fing右Fing，仲嫌唔夠嘅話可以用埋佢嘅運動模式，懸掛硬多兩錢重，片彎更爽利！
抵讚：行車寧靜，設有懸掛調校能適應各種環境，最重要係車頭嗰個鯊魚鰓型到爆。
要彈：車身低矮有啲唔慣，A柱太粗阻礙視線，擋風玻璃個雨點感應器好礙眼。
Peugeot407Coupe規格
引擎：2,946c.c.V6DOHC
馬力：211hp/6,000rpm
扭力：290Nm/3,750rpm
尺碼：4,815×1,868×1,395mm
傳動：6前速Tiptronic半自動波，前輪驅動
輪胎：235/45YR18
車重：1,712kg
車輛提供：法國汽車（31181828）
當年型爆今日睇番似薯仔
標致406Coupe喺95年推出時被譽為最美麗嘅法國轎跑車，不過到咗今時今日，尤其係拍埋407Coupe一齊比較嘅時候，呢位當年嘅型男隨即變薯仔；但講到馬力方面，睇番Spec.，407Coupe只係多咗4匹咁大把，其次就係波箱由406嘅5前速手波或4前速自動波，變成407Coupe嘅6前速Tiptronic半自動波。
