海油化學（3983）剛於假前公布業績，去年股東應佔溢利上升74%，至16.4億元（人民幣．下同），每股盈利48.4分，末期息1.5分，期內收入上升46.1%，至34.6億元。呢份成績表本來係超出預期，但假前高開後有獲利沽盤，低收僅升1格。
事實上海油化學自上市後炒咗約1個月至3.53元水平後，已經橫行咗成5個月，現價同去年10月底個價比較，無乜上落，要股價作出突破，睇怕要有啲好消息至得。目前海油化學生產嘅尿素化肥，受到國內太多小型化肥生產商的競爭，去年跌價約7%，與國際化肥價格節節上升嘅走勢背馳，呢個現象，要靠行內不斷併購去解決。
另一方面，去年10月即集團上市之初，國資委宣布由中海油集團全面接管中化建，由於海油化學已與母公司中海油集團簽訂了不競爭協議，因此中化建資產只能被注入海油化學，待收購後的中化建資產整合過後，相信好快就會有注資消息公布。
海油化學除咗生產尿素之外，近年發展得最快係甲醇，今年海油化學嘅主要增長動力將來自60萬噸甲醇廠投產，甲醇價格近期跌幅唔細，不過呢種話明係替代能源，只要國際油價唔大跌，甲醇嘅價錢亦都跌極有個譜。呢間有業績及注資消息支持嘅公司，短線雖然未必好有炒味，但係長揸風險低，回報更隨時有驚喜。
長盈有炒高誘因
長盈集團（689）年初宣布夥拍江西銅業（358）組成合營，轉型金屬股加上拍住大碼頭，本來大把前途，但係被評未有工廠，唔知幾時至有盈利貢獻，故此公布好消息後股價曾經跌到四腳朝天。不過，假前該公司終於搵到生產基地，喺清遠市以4700萬元收購一家生產陽極板、電解銅等製品嘅工廠，估計日後仲會有其他收購，因此長盈好可能會炒高配股集資。