時間過得好快，轉眼間5日假期又完咗，揸咗貨過復活節嘅股民應該會好開心，因為昨日㗎仔股市同A股都做得好好，今日港股好可能出現大挾淡倉嘅場面。
人行喺港股放假期間突然調高銀行準備金率，但A股就繼續炒上，當壞消息冇到，即係話個股市得一個方向，就係升。A股升，唔多唔少都會帶動H股上，假期前H股嘅走勢都唔錯，呢個禮拜可以睇好啲。
要提醒大家，近排想郁嘅國內銀行股始終未有成交配合，加上人行調高準備金率，呢啲股份可能仲要等一排先炒上，短炒都係吼吓啲強勢股，上禮拜提過嘅油股、金股、銅鐵股係優先考慮。
花旗嗰邊仲有好多壞消息，但係股市嘅技術走勢就好似想炒上去，如果食住復活假前嘅升勢大幅炒上，咁樣短時間內嘅環球股市都會做好，港股上試21000關嘅機會亦都會大增，形勢比人強，如果恒指仲係喺高位挾上，短線都係寧好勿淡，否則損失可以好大。
近排啲樓盤都算去到貨，二手樓嘅交投都幾旺，地產股可以繼續睇實，第一輪炒上，一定係一線股份，長實（001）同新地（016）嘅C輪最值得留意，其次就係大銀行股嘅C輪。
恒生C輪6064：恒生（011）上日收112.90元，喺長假期前靜靜雞創近期新高價，平均線嘅組合都轉強番，成交大幅增加，長假之後應該有動作，可以諗吓隻恒生C輪6064。上日收52仙，槓桿率21.7倍（有效14.1倍），對沖值0.64，正股升上116元，6064應該喺72仙樓上，正股升上120元，隻輪應該唔會低過1.05元，正股跌穿111元止蝕。